Stichting Monumentenfonds Aruba (SMFA) ta lidera y organisa diferente evento pa duna atencion na e Dia Internacional di Monumento riba 15 di september. Museo Arqueologico Nacional Aruba – MANA tambe ta un di e 13 monumentonan cu ta habri pa publico diadomingo awor di 10’ or di mainta pa 3’or di atardi. Na MANA tambe participantenan di scol basico por haya nan stempel den nan paspoort cultural. Na fin di dia dilanti Postkantoor na Playa lo saca ganador di e ‘recorido monumental’.
Edificionan historico cu ta forma parti di MANA a ser declara monumento protegi legalmente na 2010. Cada un tin su historia cultural, beyesa y arkitectura. Presente lo ta dos nieto di Dundun Ecury cu lo comparti nan recuerdonan di nan grandinan y di e diferente edificionan. Unicamente diadomingo awor e prome piso di Cas Dundun ta habri pa publico. Sera conoci cu Cas di Mamachi, Cas Dundun cu su balcon impresionante y tambe e cambernan di drumi di entre otro Boy y Nicky Ecury.
Bishitantenan por mira e documentario cortico “Dada Picus”, produci door di Rebecca Roos Productions y co-financia pa UNOCA. Dada Picus a traha diferente monumento na Aruba y ta ser reconoci como arkitecto cu un estilo unico.
Arkeologo Raymundo Dijkhoff lo duna un charla cortico di e monumentonan arkeologico terestre y sub-aquatico. Lo tin dos momento pa asisti na e presentacion interesante aki cu ta 11’or di mainta y 1’or di merdia.
Manera semper MANA ta duna oportunidad pa recauda fondo pa un bon causa. E biaha aki grupo “Hunto mane un famia” lo percura pa e bar y cushina. Lo ofrece entre otro un festival di sopi, snack crioyo, popcorn y dushi juice di lamunchi. Adicional nan lo tin actividadnan divertido pa mucha manera pintamento di cara, “sensory box” y mas.
SMFA ta percura pa dushi ambiente cu diferente banda tipico cu lo toca riba e plenchi dilanti di MANA y nos bisiña Monumentenburo cu tambe lo ta habri. Asina bishitantenan por pasa akinan di biaha. Hasi bon uzo di e oportunidad unico aki pa sera conoci di mas cerca cu 13 monumento na Playa y pasa un dushi rato cu famia y amigonan.
