‘Un celebracion di arte y cultura’

 

Aruba Tourism Authority (A.T.A.) ta mira bek na un fin di siman grandi pa loke ta trata arte, creatividad y cultura na Aruba. Un biaha mas por a mira e ciudad di San Nicolas wordo transforma y bira e punto central pa tur amante di arte na Aruba.

 

E aña aki, Aruba Art Fair a presenta obranan di arte impresionante di mas di dos shen artista local como internacional. Tur ta artistanan cu a desplega talento y creatividad excepcional pa eleva y haci San Nicolas como e centro di arte riba nivel internacional, y como un experiencia cultural unico y memorabel.

 

A.T.A. por mira bek riba un partnership importante cu Aruba Art Fair, relacion cu ta existi for di inicio di e evento aki. E promocion di arte y cultura ta hopi importante pa A.T.A., y Aruba Art Fair ta un di e eventonan cu ta duna e plataforma perfecto pa logra esaki. Desde su humilde comienso na 2017, Aruba Art Fair a sigui crece y bira un evento cu ta impacta e comunidad na un nivel hopi amplio. Un evento cu a evoluciona, caminda cu por a experiencia diferente presentacion bibo, arte contemporanio, workshop educativo, y diferente proyecto cu enfoke na haci arte mas accesibel. Danki na e grandioso Aruba Art Fair, awe por bisa cu San Nicolas ta riba mapa como e Capital di Arte di Caribe y ta keda un atraccion atractivo.

 

Artenan mural, cu ta visibel y accesibel durante aña, seguramente lo sigui fungi como ‘Photo Moments’ pa tanto e local como tambe e bishitante di e isla. Esaki lo yuda promove arte como un parti integral di nos comunidad y experiencia turistico.

 

A.T.A. ta felicita e organisadornan y ta gradici tur e artistanan, voluntarionan, y bishitantenan cu a forma parti di e di shete edicion di Aruba Art Fair. A.T.A. ta comprometi pa sigui sostene e tipo di iniciativanan cu ta duna realse na e desaroyo artistico y cultural di nos isla.

 

Tocante Aruba Tourism Authority (A.T.A.)

Desde 1 di januari 2011, Aruba Tourism Authority ta opera como un entidad ‘Sui Generis’. Un organizacion independiente den e esfera publico. Aruba Tourism Authority ta fungi como ‘Destination Marketing and Management Organization (DMMO)’ y ta responsabel pa uni interes turistico entre socionan local e internacional. A.T.A. ta pone hopi enfasis riba e modelo di “High Value-Low Impact” cu ta pone enfasis pa mehora y mantene esfuerzonan pa logra e balans entre cuater pilar: ‘Calidad di Bida di e Residente’, ‘Calidad di Experiencia di e Bishitante’, ‘Proteccion y Preservacion di Naturalesa & Medio Ambiente’, y ‘Contribucion Economico na nos isla’. Ta enfoca na atrae e bishitante cu lo inverti mas (calidad en bes di cantidad mirando cu capacidad di carga ta sigui ricibi atencion di parti di A.T.A.), lo aumenta e balor economico di e bishitante, posiciona Aruba como un pais desea y sostenibel, y posiciona Aruba como lider di desaroyo como un destinacion.