Tanki Leendert – Caya ta papia cu den e division 60+ di biyar na Aruba tin un “Max Verstappen” ta cana rond. Un guy cu durante torneo bo por lanta foi bo stoel trankilamente bay dal un “biertje” na bar, sali un rato haci bo “laundry”, pasa busca un hamburger, y yega bek n’e final sin preocupa kico e score ta pasobra toch e t’esun cu ta bay gana di tur moda. Esaki ta conta p’e otro finalista tambe, kende, segun caya ta papia, si el a lesa un corant menos na trabou, lo e por ta a sali campeon.
Diasabra ultimo, 31 di augustus, e palacio di biyar aya na Tanki Leendert, tabata e scenario dje gran final dje torneo pa biyar bola 8 categoria 60+, esta Jani Brokke Memorial. E ronde final a cuminsa cu e kwartfinale entre “Sheik” Orman y “Lucky” Viviano na mesa 1; Moonchi Kelly contra Edwin “Kwek” Chirino na mesa 2. E dia aki si “Lucky” a “run out” su suerte, y despues di un bon bataya strategico hiba door di “Master of Doom” “Sheik” Orman, esaki ta suta “Lucky” cu score di 2-0. Djey, mester a tene un pauze chikito pa yama Total Cleaning bin limpia e desaster cu “Lucky” a haci riba mesa! N’e otro mesa, cos un tabata canta macamba pa Moonchi tampoco, kende no tabata por cu algun dje tironan skerpi di “Kwek”.
Desde e momento ey, cos a cuminsa bira “spannend”! Gino Geerman ya caba tabata warda den final pa wak ken ta bin enfrent’e, y hopi tabata puntra nan mes si e biaha aki si, Kwek lo por kibra e tradicion dje ultimo torneo(nan) caminda ta Gino Geerman y Junini Quant ta topa bek den final. Pero, mescos cu den otro ocasion, “Kwek” a cay net “een kwekkie te kort” pa Junini, kende —atrobe— ta pasa pa topa cu Gino den final. Y asina, pues, manera nan ta bisa, “the rest is history”. Sin mucho trabou, Gino “Beton” Geerman ta bolbe gana Junini den final. Un triunfo merecidamente, ya cu pa a yega eynan, varios hungado 60+ cu keto bay ta activo den liga di FEBIAR mester a cay na caminda. Un palabra di pabien sigur sigur pa GinoGeerman como campeon 2024, pa Junini como sub-campeon 2024, y “last but not least” pa Edwin Chirinologrando di 3 lugar. Un palabra di elohio tambe pa Moonchi Kelly, kende un biaha mas a sa di organisa un tremendo torneo Jani Brokke Memorial den cuadro celebracion di Fundacion Movimento ta Bida.
