E club di servicio asina popular riba nos isla, Aruba Lions Club cu ta sirbiendo comunidad pa mas cu 75 aña, recientemente a ricibi un bunita gesto di un compania di aviacion cu ta Southwest Airlines.

 

Southwest Airlines tin varios rolstoel cu nan ta uza pa por brinda e servicio na e biaheronan cu ta yega of sali for di Aruba cu mester haci uzo di un rolstoel den e edificio di aeropuerto mes.

E compania a tuma e desicion cu a yega tempo pa reemplasa e rolstoelnan aki y a dicidi di haci un donacion di ocho (8) rolstoel, cu ta den hopi bon condicion, na Aruba Lions Club.

Aruba Lions Club ta hopi agradecido na Southwest Airlines cu e bunita gesto aki y contento cu awor por sigui yuda mas ciudadanonan cu ta den necesidad di esaki.

 

Ultimo tempo Aruba Lions Club ta ricibiendo un cantidad grandi di peticion pa cama di hospital y rolstoel y ta dificil pa por cumpli den un tempo cortico cu esakinan pa motibo di scarsedad.

Cu esaki Aruba Lions Club ta hasi un suplica na comunidad pa esnan cu tin un cama of rolstoel for di uzo y ta desea di yuda un prohimo cu esaki, por yama Aruba Lions Club na 582-1118 y nan lo pasa busca esaki pa nan proyecto di “Hospital bed & Wheelchair” y asina sigui yuda nos comunidad.

 

Segun e registro di dicho organisacion, tin un gran cantidad di cama y rolstoel den comunidad cu no a wordo entrega bek despues di uzo y kizas a wordo hiba na un otro adres y p’esey ta pidi encaresidamente si por tuma contacto cu e organisacion pa por registra esaki na e adres nobo pa asina por update e registro.

Aruba Lions Club ta orguyoso y contento di su proyecto di “Hospital bed & Wheelchair” cu pa hopi aña ta ofreciendo un gran ayudo na e enfermonan den nos comunidad.

 

Un biaha mas ta gradici Southwest Airlines pa nan bunita gesto y ta spera cu den futuro por tin mas compania cu por sigui e ehempel aki y yuda Aruba Lions Club sirbi nos comunidad.