Calabas/Kudawecha – Por tarda, pero Snor ta bin prepara bek! Aña pasa, e legendarionan di Pariba Legends a ‘scarmay’ Team Snor sorpresivamente cu score ‘nip-nip’ di 21-20! Wel, e biaha aki, durante su celebracion di su hacimento di aña, e conocido Nelson ‘Snor’ Perez a bin dicidido pa ‘schil het appeltje’. E palacio di pega piedra aya net n’e grens entre Calabas y Kudawecha, e mundialmente famoso Domino Square Garden, a keda tembla so ora cu den un frega di wowo Team Snor a sali habri riba un nitro y tuma un bentaha monster di 5-0 riba nan contrincante! Pariba Legends ta dal un ‘hik’ y corta bentaha na 2-5, pero Snor ta habri booster te na 8-2!

Pariba Legends ta style di ‘roeien met de riemen die jehebt’ y ta corta e bentaha un tiki so, pero halftime ta bay aden cu score significativo pa Team Snor di 11-6! “It’s freesnack time!” cortesia di chef, y manera un estampida hungadonan y publico presente ta basha riba e pasapalonan gratis cu ta skeiro rond na ordo! Ata! Diripiente bolo a sali! Cantamento di “Happy Birthday” ta resona tur rond di Kudawecha, strobando e pober parha y cabritonan di tin un anochi di paz y trankilidad! Wega ta sigui, y aki si Pariba Legends a bin duro bek, pero Snor semper a keda ‘net een stapje voor’! Paniek den tent di Snor, pero e ‘tentkommandant’ ta haci cambionan drastico y sumamente necesario den line up cu resultado cu  Snor ta yega top di sero cu score di 20-18! Prome cu Pariba Legends por ‘get their act together’, Team Snor ta claba e piedra mortal y ta triunfa cu score di 21-18! Un wega sigur sigur cu a pone varios fanaticada di ambos team come nan huña! Y despues? “Que siga la fiesta’, y Team Snor hunto cu nan ekipo ruman Pariba Legends ta cuminsa un celebracion cu a ‘make sure’ tur parha y cabrito den vecindario a drumi c’un banda di wowo habri! Un palabra grandi di danki di parti di Nelson “Snor” Perez na tur su team, amigo y conocinan, pa un tremendo celebracion di su hacimento di aña caminda Nelson “Snor” Perez a cumpli mes e edad dje aña cu el a nace.