Oranjestad – Minister Xiomara Maduro durante conferencia di prensa siman pasa dialuna a indica cu Gabinete Wever-Croes ta atende cu e gastonan di mas grandi di gobernacion, cual ta gastonan di interes di debe di Pais Aruba y e gastonan di personal di Gobierno.
Presupuesto cu surplus pa por baha debe
E mandatario encarga cu finansa a splica cu pa locual ta trata gastonan di interes, Gobierno ta trahando pa presenta presupuestonan pa Pais Aruba cu un surplus pa asina evita di tin deficit pa cual mester traha debe nobo. Den un situacion di surplus, Gobierno lo fia solamente pa refinancia su debe y esaki no ta subi e suma di e debe nacional. Gobierno hunto cu IMF ta trahando riba un maneho con pa atende cu e debe di Pais Aruba pa asina haci esaki pagabel pa Pueblo di Aruba.
Gastonan di personal tin un plafond
Pa locual ta trata gastonan di personal, Minister Maduro na man di un grafico di e Uitvoeringsrapportage (URK) di e ultimo kwartaal di 2019, a mustra e desaroyo di e gastonan di personal di Gobierno. Den e grafico por mira cu e gastonan di personal di Gobierno tin un plafond, ilustra den un liña ‘gestippeld’ cora, di 479 miyon florin cual ta e suma maximo di gasto di personal cu a keda acorda den e protocol firma cu Hulanda na november 2018. For di e grafico ta bisto cu e gastonan di personal a keda bou di e liña ‘gestippeld’, indicando cu Gabinete Wever-Croes ta cumpliendo cu locual ta e palabracion cu Hulanda pa gasto maximo di personal.
Overtime ta pone presion riba gasto di personal
E mandatario a splica cu Gobierno ta trahando pa baha e gastonan di personal y cu esaki no ta un tarea facil. Den e grafico a ilustra tambe un liña creciente cu ta mustra e gastonan relata na ‘overtime,’ cu ta un parti di gasto di personal cu ta pone basta presion riba e gastonan total di personal. Minister Maduro a splica cu tin diferente motibo pakico tin gasto di ‘overtime,’ pero cu e situacion di Venezuela ta un di nan cu ta pone hopi presion riba e gastonan di personal relata na ‘overtime.’
Gasto di debe y personal tin tur atencion
E mandatario a enfatisa na final di e conferencia di prensa cu Gobierno ta trahando na un manera serio pa atende cu su gastonan di mas grandi cual ta gasto di interes y gasto di personal. Den e trabounan aki Gobierno ta haya asistencia technico tambe di IMF cu recientemente a haci un investigacion di e gastonan di personal y a brinda algun recomendacion con pa baha e gastonan aki. Hunto cu IMF, Gobierno ta trahando tambe riba un plan di maneho di debe pa asina por haci e debe pagabel pa e Pueblo di Aruba creando espacio financiero pa por inverti den e hende.
