Dia 26 di september 2024, campeonato mundial lo inicia y ta conta cu alrededor di 500 participante.  

ORANJESTAD: Recientemente, Minister di Enseñansa y Deporte Endy Croes a reuni cu e directiva di Aruba Domino Bond, en conexion cu campeonato mundial cu lo tuma luga otro luna aki na Aruba. E directiva internacional di Domino tabata na Aruba aña pasa y a reuni cu Aruba Domino Bond y e mandatario di Deporte. Nan ta preparando un campeonato mundial, unda ya 400 hungado di diferente pais a confirma nan participacion. Aruba lo tin rond di 100 hungado participando den campeonato aki, pues un total di 500 participante. E campeonato mundial aki tin su reglanan stricto y ta creciendo mundialmente.  Aña pasa el a tuma luga den e prestigioso ballroom na Las Vegas. Minister Endy Croes a indica cu e ta contento cu Aruba ta e afitrion di e campeonato e aña aki. E mandatario di Deporte ta keda den comunicacion cu Aruba Domino Bond. Gobierno di Aruba, SSA, Lotto pa Deporte y ATA hunto ta sostene Aruba Domino Bond pa e magno evento aki cu lo tuma luga prome biaha den historia na Aruba, dia 26 di september 2024.