Tanki Leendert – Mescos cu añanan anterior, “Fundacion Movemento ta Bida” (FMTB), ta organisa en conexion cu e Weganan Nacional 60+, e candeloso torneo pa biyaristanan 60 + titula “Jani Brokke Memorial”. E torneo aki lo dal habri aya n’e palacio di biyar na Tanki Leendert  diasabra awor 17 di augustus pa 6:00 PM. E torneo lo sigui dia 24 di augustus, y lo termina dia 31 di augustus. Un torneo cu lo dal portanan di santana habri di San Nicolas te cu Westpunt!

Si shonnan, asina mes, si bo kier bin presencia, aprecia, y admira poco weganan “old school”, anto esaki ta bo oportunidad! Ya caba nos tin entendi cu algun djaca di caya ya a manda dede halto y meld nan participacion. Entre otro e famoso Frido “Maltin Polar” Dirksen, Gino “Beton” Geerman, “Sheik” Orman, Edwin “Kwek” Chirino, “Lucky Viviano” Frank, Juni “Kilowatt” Figaroa, Errel “Pitbull” Tromp, Rudolfo Arends, Robby “Basestation” Tromp, y “last but not least”, e legendario Buchi “donde pone el ojo” Briezen!

En total ya nos tin entendi tin mas cu 26 participante inscribi, y porta di santana ta sigui keda habri! Pa mas informacion y pa inscribi ultimo ora, por tuma contacto cu e “portier”, señor Moonchi Kelly na number di celular 699-1994. Si bo tabata un “crack” den añanan 70 o 80, no perde e oportunidad aki pa bin mustra pueblo cu ainda bo taco di biyar ta stret stret y bo corta ta grandi keto bay! Yega!