Calabas/Kudawecha – E conocido lider di e team durisimo di domino Team Snor, esta Nelson “Snor” Perez, ta den un racha di bacanal total celebrando su hacimento di aña! En conexion cu esaki, el a organisa 3 bataya di domino entre e teamnan cu ta afilia cu ne, esta Team Snor, Pluma Gang, y Pariba Legends. Den cuadro di esaki, diasabra ultimo e di dos wega a tuma luga caminda e ekipo di Pluma Gang a enfrenta e legendarionan di pariba, esta Pariba Legends.

Snor mes tabata den “happy hour mode”, ya cu e mes no ta participa e anochi ey. Oficialmente e ta hunga pa Team Snor, y inoficialmente e ta “yuda c’un piedra” n’e otro dos teamnan ora Team Snor no ta participa. E anochi aki, el a haya e chens pa bay estilo “glaasje op, laat je rijden” manera nan ta bisa na Hulanda.

Manera semper, den halftime e pasapalonan a core rond completamente gratis cortesia dje chef dje palacio di domino aya n’e grens entre Calabas y Kudawecha, e ya famoso Domino Square Garden. Un bista riba e scoreboard, ta duna señalnan alarmante cu Pluma Gang a baha razo riba e legendarionan di pariba di brug! E “Plumeronan” tabata dilanti cu score di 11-7. Conociendo e legendarionan, esaki ta nada pa preocupa nan mes, ya cu nan a yega pasa den hopi candela mas grandi. Sinembargo, e anochi aki algo a bay drasticamente fout den e calculacionnan dje legendarionan. Sea tabata “battery low”, of falta di vitamina B, pero ni cu grua of takelwagen por a pusha e legendarionan padilanti! Cu score relativamente facil, Pluma Gang ta pluma e legendarionan cu score final di 21-14! “Niet echt om macamba te zingen, hè”! Esaki t’un señal cla y raspa pa Pariba Legends cu nan mester “get their act together soon” si nan kier tin un chens contra Team Snor den siguiente wega dje “Snor Happy Birthday Event” diasabra awo dia 17 di augustus!