Calabas/Kudawecha – Shonnan, e flamante lider di Team Snor, e conocido Nelson “Snor” Perez, ta den un “vibe” total di celebracion pa su cumpleaños! Pa es motibo aki tur e teamnan afilia y liga na Team Snor ta participa den un mini torneo “nan cu nan” pa dje forma aki den e fin di simannan aki celebra hacimento di aña di nan co-fundadory amigo. Nos ta papiando aki di e ekiponan Team Snor, Pluma Gang, y Pariba Legends.

Siman pasa a tuma luga e encuentro entre Pluma Gang y Team Snor, caminda cu Pluma Gang a declara cu nan lo “destrosa” e ekipo di Snor. Cos a cuminsa cayente berdad y halftime a bay aden cu Pluma Gang ganando berdad cu score di 11-7! Sinembargo, durante halftime capitan Magda a haci su magia y trece algun “adjustments” n’e line up dje team. No mucho tempo despues, e score ta empata na 13-13, y despues Team Snor a bay biento en popa y gana 21-18!

Diasabra awor, 10 di augustus, cuminsando pa 8’or di anochi, e palacio di pega piedra aya net n’e grens entre Kudawecha y Calabas, e famosisimo asina yama Domino Square Garden, lo ta e scenario dje grandioso bataya entre Pluma Gang y Pariba Legends! Esaki lo ta e di dos encuentro den e ciclo di celebracionnan pa Snor su hacimento di aña. Alabes, tin papia cu lo tin bautismo dje uniform nobis nobis di Pariba Legends. Manera semper, entrada ta completamente gratis pa pueblo en general, y durante halftime pasapalonan lo core totalmente por nada cortesia dje chef di Domino Square Garden. Dus señoresamante di un bon pachanga di domino, diasabra awor 10 di augustus cuminsando pa 8’or di anochi, e clasico encuentro entre Pluma Gang y Pariba Legends, en celebracion di Nelson “Snor” Perez su fecha natal! Yega!