ORANJESTAD, Aruba – 18di Februari 2020: Di e momento cu coronavirus a sali den noticia e departamento di Hygiëne en infectiepreventie di Dr. Horacio E. Oduber Hospital a sinta hunto pa asina hinca di biaha un protocol den otro pa tur hende ta prepara y ta riba mesun liña si encaso Aruba y Hospital mester haya nan confronta cu e Coronavirus nobo. E team aki ta consisti di un arts-microbioloog, un internist-infectioloog y tres “deskundige Infectiepreventie. Recientemente departamento di Hygiëne en infectiepreventie di HOH a duna tambe e personal di Departamento di Emergencia di HOH un training di preparacion pa si encasohaya nan confronta cu pashentnan cu tin sintoma di coronavirus.
Como specialistanan den prevencion di infeccion a sinta hunto y a volg e desaroyo rond di e coronavirus, asina Sinead Geerman, deskundige infectiepreventie, a duna di conoce. Tambe a sinta cu Departamento di Salubridad Publico (DVG), conhuntamente cu tur instancia local pa asina traha riba un plan den cuadro di e coronavirus nobo. Despues cu a traha riba un protocol interno, basa riba recomendacion nan internacional, e departamento di Hygiëne en infectiepreventie di HOH a sinta cu e departamentonan concerni di hospital pa cuminsa cu un plan y brainstorm tocante e diferente scenarionan di coronavirus cu lo por confronta na hospital.
Hospital no ta desconoci cu enfermedadnan respiratorio cu por ta contagioso. Nos ta por ehempel den e temporada awo di influenza, esta griep, y tambe Hospital sa atende pashentnan cu ta drenta cu tuberculosis. Tin un beleid pa esaki y tambe tin cambernan di isolacion capacita pa ora tin cu isola pashentnan, Sinead Geerman a duna di conoce. E personal ta conoci cu e protocol y henter e proceso cu tin di cana rond un pashent cu yega Departamento di Emergencia, of cualkier otro departamento di Hospital con pa deal cu e pashent, hinc’e den isolacion y bisti tur ekipo di proteccion.
E coronavirus ta un virus nobo y pues a actualisa e protocol basa riba e sintomanan aki y laga e personal cera conoci cun’e. E personal di Hospital a hasi nan training necesario y ta capacita, y alabes tin camber di isolacion pues tur hende por ta trankil si encaso pashent yega hospital cu sintomanan di coronavirus. Si esaki pasa lo isola e pashent di biaha y tur hende lo bisti nan ekipo di proteccion pa asina aki contene un posibel caso di coronavirus y evita cu e virus ta sigui spreid.
E sintomanan di coronavirus ta hopi similar cu e otro enfermedadnan respiratorio cu ta contagioso. Esakinan ta verkoudheid, tosamento, dolor di garganta, dolor di cabes, keintura. Ta importante pa si encaso un persona ta experenciando e sintomanan aki y den e ultimo 14 dianan tabata na China, tin e posibilidad di ta contagia cu e virus. Si esaki ta e caso acudi na dokter di cas of si yega na Departamento di Emergencia nan ta cla pa atende bo y isola bo di biaha y tuma e precausionnan necesario.
