![](https://www.awe24.com/wp-content/uploads/2024/07/Evento-Aruba-meets-Brazil-2-668x334.jpg?v=1721944938)
Aruba Tourism Authority (A.T.A.) y Aruba Airport Authority (AAA) den presencia di prensa internacional, lider- y socionan clave den e industria, a anuncia y celebra introduccion di vuelo directo entre São Paulo, Brasil y Aruba. Un desaroyo emocionante cu ta marca un logro significativo y ta fortalece e laso turistico y economico entre e dos paisnan.
E anochi a inicia cu Carlos Barbosa di A.T.A. Brasil cu a expresa gratitud na tur esnan presente. A enfatisa y elabora riba e impacto positivo di vuelonan directo, e importancia di e ruta nobo aki, y e relacion di termino largo entre Brasil y Aruba. Brasil ta un di e mercadonan primario na Latino America pa Aruba, cu expectativa pa crece cu 40% na 2025, compara cu 2024.
E programa, cu a conta cu presencia tambe di Consul di Hulanda na Brazil Sr. Peter de Bruijn, a continua cu discurso di Ronella Croes CEO di A.T.A. cu a enfoca riba e strategia pa cu atrae bishitantenan di “High Value”, importancia di diversificacion den e contexto aki y cu esey crecemento di e mercado Brasilero cu a conoce un crecemento promedio anual di 14.7% entre 2011 cu 2023. Tambe a resalta e hecho cu e Brasilero ta un di e mercadonan cu ta gasta mas na Aruba durante di nan vacacion y esaki entre otro ta haci di Brasil un mercado clave. “Nos ta keda subraya e importancia di e mercado aki pa Aruba, cu ta conta cu un estadia promedio di 6,3 anochi. Segun estudio di VISA di 2023, e bishitante Brasilero ta conta cu un patronchi di gasto di 843 dolar pa dia. Cual ta nifica cu Brazil ta bira e segundo mercado cu mas ta gasta na Aruba.” tabata palabranan di Ronella Croes CEO di A.T.A.
“Na Aeropuerto Internacional Reina Beatrix, ta importante pa nos pa tin socionan grandi den aviacion manera GOL. Un aerolinea cu hopi presencia den un mercado grandi di Brazil, y cu potencial excepcional pa Aruba. Nos a logra sigura e ruta directo di São Paulo, Brazil pa Aruba pa e local y bishitante”, tabata palabranan di Jo-Anne Meaux-Arends, Aviation Business Development Executive di AAA.
“Despues di 39 aña den e mercado, oficina di A.T.A. LATAM tin como meta pa Aruba bira e destinacion preferí pa e bishitantenan Brasilero. Cu e vuelo nobo non-stop di Brazil pa Aruba, nos ta sigur cu nos lo consolida nos posicion.” tabata palabranan di Jordan Schlipken Croes, Area Director di A.T.A. Latino America.
Otronan cu a hiba palabra tabata Danillo Barbizan Director di Benta di GOL Airlines, y Julia Orrico Head of Airline Business di aeropuerto di Guarulhos.
Ta di menciona cu prome cu e evento, Aruba a sostene un rueda di prensa cu a conta cu presencia y palabranan di Ronella Croes CEO di A.T.A., Jordan Schlipken Croes Area Director di A.T.A. Latino America, Jo-Anne Meaux Arends Aviation Business Development Executive at AAA, Diogo Bertussi Coordinador di Planificacion Strategico di rutanan Aereo di GOL Airlines, y Julia Orrico Head of Airline Business Aeropuerto Internacional GRU.
Cu incremento di inversion den mercadeo, accionnan instrumental cu GOL tambe cu esnan cu ta bende Aruba den e mercado, y cu e bishita y reunionnan y eventonan clave e siman aki, Aruba a reitera su compromiso y ta sigui crea “momentum” den e mercado!
Tocante Aruba Tourism Authority (A.T.A.)
Desde 1 di januari 2011, Aruba Tourism Authority ta opera como un entidad ‘Sui Generis’. Un organizacion independiente den e esfera publico. Aruba Tourism Authority ta fungi como ‘Destination Marketing and Management Organization (DMMO)’ y ta responsabel pa uni interes turistico entre socionan local e internacional. A.T.A. ta pone hopi enfasis riba e modelo di “High Value-Low Impact” cu ta para pa un balanse entre aumenta e balor economico di e bishitante, posiciona Aruba como un pais desea y sostenibel, y posiciona Aruba como lider di desaroyo como un destinacion. Cu meta pa sigui mantene esfuerzonan den linea segun e balanse menciona, y logra aumenta entrada pa medio di calidad di turismo en bes di e volumen cu nos destinacion ta ricibi. Capacidad di carga ta sigui ricibi atencion di parti di A.T.A.