![](https://www.awe24.com/wp-content/uploads/2024/07/A.T.A.-EU-Team-668x334.jpeg?v=1721381204)
Durante e prome mitar di 2024, A.T.A. a sigui promociona e marca di Aruba na un nivel halto pa asina atrae e bishitante desea na nos isla. Tambe a inverti y sostene multipel accion pa guia e desaroyo di nos producto den e direccion desea.
Mercado di NA y Canada
Durante e prome seis luna di 2024, e mercado di Norte Amerika a mira un aumento di 17.1% compara cu e prome seis luna di 2023. Mercado di Merca a crece 17.1% te cu juni 2024 compara cu e mesun periodo den 2023. Pa mercado di Canada, a mira un aumento di 17.3% den e prome seis luna di 2024 compara cu e prome seis luna di 2023.
Na februari 2024, e prome ‘Earned Media’ y ‘Creator Workshop’ di 2024 a tuma lugar, caminda cu diferente socio local a asisti y colabora pa miho compronde y evalua resultadonan di ‘earned’ y ‘creator’. Na mei 2024, varios socio local a ricibi grupo di pensa dedica na boda, kende a disfruta di experiencianan priva cu Aruba tin pa ofrece den e categoria menciona. Na juni 2024, a tuma lugar evento di Relaxathon cu a conta cu un total di shen participante cu a competi den e prome competencia di relaha den Caribe. A.T.A. a uni forsa cu e snowboarder profesional, skateboarder, y cinco bes ganador di Olimpiada, Shaun White, pa organisacion di e evento di Relaxathon. E evento a conta cu un alcanse amplio, segui pa un variedad di ‘earned tactics’. Na final, e esfuersonan aki a resulta den cobertura den media manera ‘People Magazine’, ‘NBC Sports’, ‘Bleacher Report’, ‘Snowboarder’, y mas.
Mercado di Europa
Na januari 2024, Oficina di turismo di Europa a conta cu un logro prestigioso di e miho oficina di turismo durante di Vakantie Award 2024. Esaki ta bira e di tres biaha cu e oficina di turismo di Europa ta wordo reconoci. Riba e mesun anochi, colega Aaliyah Windster, Sales Executive di A.T.A. Europa ta wordo honra cu e Vakantie Award pa Talento di aña 2024.
Encuanto operacion, ta di menciona cu KLM y operadornan di tour Europeo ta enfrentando desafionan operativo, resultando den un recuperacion mas gradual di loke a spera den mercado Europeo, cu un rendimento YTD di -7.6% compara cu 2023. Falta di tecnico, tripulacion, y piloto, ta limita e capacidad pa Aruba y a resulta den anulacion di vuelonan afectando e conexion via Amsterdam directamente, cual tambe ta conduci na vuelonan mas largo y menos atractivo pa biahero.
British Airways ta confrontando dificultad. E demanda halto di e mercado di Merca tah alto y ta conduci na aumento den tarifa di estadia cual ta impacta e benta via entre otro British Airways Holidays. E mercadonan di Italia, Suisa, y Belgica ta recuperando compara cu 2023 y ta premira un bon rendimento pa augustus y september 2024. Mercado di Suiza y Belgica ta ser identifica como mercadonan chikito pero di balor halto. E hecho cu e cifranan di 2024 ta cerca di cifranan di 2023 ta indica cu por comberti benta aunke cu tin desafionan cu capacidad di vuelo. A.T.A. Europa ta conscientemente inverti den e mercadonan aki como parti di strategia di High Value – Low Impact.
Mercado Latino America
E mercado di Lartino America a experiencia un aumento di 59% den e prome seis luna di 2024 compara cu e prome seis luna di 2023. Diferente mercado a logra mira un resultado positivo adicional den e prome seis luna di 2024: Peru (265%), Chile (93%), Argentina (52%), Colombia (47%) y Brasil (33%). A.T.A. LATAM ta enfoca riba strategia di crece e mercado di ‘long haul’ pa aumenta e bishitante di calidad. E mercadonan aki ta Brazil, Chile, Peru y Argentina. Na januari 2024, Latam Airlines a anuncia di aumenta frecuencia di 3 pa 4 semanal entrante juli 2024. Un luna despues di a inicia vuelo den december 2023. Na mes momento, a reporta un aumento di 4 pa 5 frecuencia pa oktober di 2024. Na juni, a anuncia vuelo directo di GOL Airlines desde GRU-AUA cu lo inicia na december 18 2024.
Banda di esaki, A.T.A. LATAM a celebra e lansamento di e documentario Blue Lizard Effect, e esencia di Aruba a traves di su hendenan, riba plataforma Max, Warner Channel, TNT, Discovery. E documentario a logra mas di 144 miyon di impacto globalmente y a ser mira na 46 pais. Alabes, e mercado a implementa campañanan creativo manera pa Dia di Tata, un filter di ‘virtual reality’ y a continua cu strategia di training y educacion di trade pa e destinacion.