![](https://www.awe24.com/wp-content/uploads/2024/07/Hub-Camara-DR-image-668x334.png?v=1721260074)
ORANJESTAD – Departamento di Asuntonan Economico, Comercio y Industria ta anuncia cu e registracion pa participa na Hub Cámara Santo Domingo ta habri. Cu interes creciendo den producto for di Republica Dominicana, tin hopi oportunidad pa comerciantenan cu kier haci negoshi cu Republica Dominicana.
Tocante Hub Cámara Santo Domingo
Hub Cámara Santo Domingo ta e exposicion di comercio multisectoral mas grandi den Caribe y e prome desaroya bou di e formato Business to Business (B2B). E evento anual aki ta e espacio ideal pa companianan:
- Expone nan producto y servicionan
- Expande nan liña di negoshi
- Siña tocante tendencianan nobo
- Amplia nan conocemento via conferencianan riba topiconan di interes general
- Lansa producto nobo riba mercado
- Participa den ronda di negoshi cu cumprado local y internacional
Proceso di Registracion
E evento ta dirigi na importado, supermercado, comerciante, distribuidor y esnan cu ta interesa den cumpra producto of servicio produci na Republica Dominicana.
Pa participa:
- Yena e formulario di registracion cu tur informacion necesario.
- Pasa door di un evaluacion di cumprado pa verifica cu ta cumpli cu e perfil rekeri pa e organisadornan.
- Warda comunicacion di desicion for di e organisadornan.
Plataforma Ideal pa Negoshi
Hub Cámara Santo Domingo ta e plataforma ideal pa conecta y concentra cu un variedad di sector formal, tanto nacional como internacional. Compania chikito, mediano y grandi por establece lasonan nobo y contactonan den un ambiente puramente di negoshi (B2B). E ta yuda crea sinergia y complementa e ‘value chain’ entre participantenan, ta yuda nan siña tocante tendencianan nobo den diferente sector comercial y ta amplia nan frontera pa haña acceso na mercado internacional, entre otro beneficionan.
Detayenan tocante Participacion
Pa comerciantenan cu ta interesa pa asisti na Hub Cámara Santo Domingo, esaki ta tuma lugar di 2-5 di september 2024, enfocando riba sectornan di: Tecnologia, Construccion, Energia, Producto Industrial y Producto Agricola. Pa participa, mester registra prome cu dia 21 di augustus pa organisadornan por crea un programa atractivo pa bo negoshi. Gobierno Dominicano lo cubri estadia di hotel y transporte local; comerciantenan mester cumpra solamente un ticket pa Santo Domingo.
Informacion di Contacto
Pa mas informacion tocante Hub Cámara Santo Domingo, por email Zuleika Quant na z.quant@deaci.aw pa ricibi mas detaye of por click aki pa registra. No perde e oportunidad aki!