Diasabra madruga a drenta informe di un accidente cu hende herida riba e caminda di Mondi Fierno pa Balashi, mesora a dirigi tanto polis como ambulans na e sitio. Na caminda pa e sitio a compronde cu e chauffeur a baha e 2 damanan herida na e sitio di accidente y a sigui bay cu e auto. Na yegada di e patruya a bin compronde cu aki ta trata di un accidente unda cu e chauffeur di e Van blanco a bay kita pa un cacho y a perde control y a bay dal un palo di lus kibra. Den e auto e chauffeur tabata hibando 2 dama pa Sanicolas cual ambos a resulta herida un mas cu e otro. E chauffeur a baha e damanan herida y a sigui bay cu e van. Mucho mas leu e no por a yega debi na daño na e auto y a purba bay sconde e vehiculo. Na yegada di e ambulans nan a atende e damanan y a hiba un di nan pa hospital. Mientras e otro a ser busca pa su doño di trabao. Polis cu a sera e caminda banda pazuid a nota un van manera poco scondi na un hanchi tera bay pabao y a bay wak. A bin resulta cu esey ta e van cu a dal e palo di lus. Un rato despues ta aparece un hende eynan cu ta bisa cu e tambe tabata den e auto y cu ela yuda e chauffeur pa hala e auto for di caminda ya cu tin hopi auto ta pasa y e van tabata riba caminda pero e mes (supuestamente) ta rondiando e chauffeur cu ta desapareci. Mirando cu e chauffeur no tey polis a confisca e auto. ELMARNV a presenta pa drecha e palo di lus kibra.