ORANJESTAD: Diaranson anochi, Minister Endy Croes a atende e Ceremonia di Despedida di e atletanan cu ta representa Aruba na di 30 edicion di Weganan Olimpico cu e aña aki ta tuma luga na Paris. Tambe presente na e ceremonia special aki tabata e miembronan di e directiva di COA, coach, mayor, federacionnan deportivo, invitadonan special y prensa local. Minister Endy Croes a hiba palabra, unda cu den nomber di Gobierno di Aruba el a desea e seis (6) atletanan cu lo participa na e plataforma mas halto di deporte mundial hopi exito. Dos (2) di e seis (6) atletanan cu dentro di poco lo biaha pa Paris, Francia tabata presente na e ocasion aki. Ademas di esaki, a haci presentacion di e uniform deportivo nobo, e trahe di ceremonia, pin olimpico y a desvela e billboard nobo cu potret di nos atletanan olimpico. Weganan Olimpico 2024 ta inicia dia 26 di juli y termina 11 di augustus proximo, unda cu alrededor di 10.500 atleta internacional lo competi na 329 evento den 32 disciplina. Aruba ta participa cu seis (6) atleta na e Weganan Olimpico di Paris 2024 esta, Ethan Westera – vela, Just van Aanholt – vela, Mikel Schreuders – landamento, Chloe Farro – landamento, Shanayah Howell – ciclismo/BMX y Philip Elhage – tiro. Sra. Kamilah Dammers ta e Hefe di Mision pa e Weganan Olimpico di Paris 2024. Na final di e bunita ceremonia, esnan presente a ser sorprendi pa un recorido di nos ex-atletanan olimpico cu a representa Aruba na e diferente Weganan Olimpico, esta Juni Faro, Esther Croes, Yvette Thuis. Jan Roodzant, Evelyn Farrel, Roshendra Vrolijk, Allyson Ponson y Daniella van den Berg. Pa conclui, Minister Endy Croes ta desea e delegacion di Aruba hopi exito na Weganan Olimpico Paris 2024. Cu deseo, dedicacion, determinacion y disciplina boso ta logra!