Diasabra ultimo 29 di Juni, Aruba Lions Club a instala su di 77 directiva den su historia y esaki ta pa e aña leonistico 2024-2025 cu a asumi nan posicion dia prome di Juli.
Despues cu a cuminsa cu e ceremonia oficial, cu canto di Himno di Aruba interpreta pa Kiziah Trimon y acompaña musicalmente pa e propio miembronan di Aruba Lions Club, e anochi a continua entre tur e miembronan y invitadonan di e diferente clubnan di servicio manera, Kiwanis Club of Aruba, Rotary Club, Kiwanis Palm Beach, Kiwanis San Nicolas, One Happy Island Lions Club, Womens Club, Quota Club y demas invitadonan.
A instala e presidente nobo pa Aruba Lions Club den persona di Lion Danny Maduro cu ya pa algun aña a forma parti di e directiva di dicho organisacion cu diferente funcion entre otro como secretario.
Lion Danny Maduro a traha tambe den diferente proyectonan desde cu a bira miembro y sigur tin e experencia y capacidad pa por dirigi e organisacion pa e aña leonistico aki.
E directiva cu Ln Danny Maduro como presidente ta consisti di; Ln Edmar Lopez (secretario), Ln Magaly Franken (tesorera), Ln Roccini Anthony (Vice-presidente), Ln Marc Fowler (Director 2 year), Ln Ivan Croes (Membership director), Ln Igor Croes (Ln Taimer) y Ln Rubin Ponson (LEO advisor).
Cu e discurso di e presidente saliente Lion Rubin Ponson, cu a dirigi su mes na tur presente riba e cantidad di proyectonan y donacionnan realisa durante e aña anterior, y sigur a enfoca riba locual a resalta durante su aña presidencial, “amor, perseverancia y respet” cu e por a mantene e confiansa di comunidad pa e prestigioso organisacion aki.
Tambe a felicita Lion Ivan Croes di Aruba Lions Club cu a wordo eligi como Gobernador di districto 35N, cu sigur a haci un bon trabou pa islanan ABC, Bahamas y Florida.
Esaki sigur ta un honor pa Aruba Lions Club, un aña cu nomber di Aruba a wordo transmiti den tur reunionnan international aya na Estados Unidos y haci Lion Ivan Croes un otro orguyo di Aruba Lions Club.
Despues tambe e presidente Lion Danny Maduro a hiba su discurso y a gradici e directiva saliente pa e bon trabou y ta spera di sigui conta cu e sosten di tur pa por hiba un otro aña exitoso y lo traha riba tur tereno di locual Lions International ta enfoca.
Lion Danny Maduro lo sigui traha riba e proyectonan andando y tambe lo percura pa recluta algun miembro mas y apesar cu awendia no ta facil, mester pensa riba ideanan nobo pa por genera mas fondo pa sigui yuda comunidad.
Na final di e anochi tur invitadonan por a hiba palabra y sigur a duna Lion Danny Maduro tur palabranan di pabien y exito pa su aña presidencial y ta spera cu por sigui traha hunto cu otro organisacionnan cu e meta pa sirbi esnan den necesidad.
Na final a sigui e parti compañerismo unda tur presente por a comparti ideanan cu otro.
Erwin Oehler Lions’ Den – Engelandstraat 11 – +297 582 1118 – alc.secretary1947@gmail.com – www.arubalionsclub.org
Un pabien na Aruba Lions Club cu ta sirbiendo comunidad for di 1947 y ta sigui demostra cu ta sigui brinda e servicio pa tur esnan den necesidad.
