![](https://www.awe24.com/wp-content/uploads/2024/06/920215d3-5d82-4626-b250-d1260ed21bad-668x334.jpeg?v=1719329285)
Oranjestad, Aruba – 25 di juni 2024 – Aruba ta actualmente den e Temporada di Calor, cual ta di juni te cu september. Durante e periodo aki, ELMAR ta particulamente vigilante riba condicion di tempo. E luna mas caloroso y cu e consumo di coriente mas halto ta tur aña durante september. Den e luna di mei di e aña aki, nos a yega un consumo peak di 148.4 MW, cu ta surpasa e consumo peak di e aña pasa na september 2023 di 144.9 MW. Esey ta señalnan di temperatura creciente y e importancia di medidanan di seguridad.
Na e momento cu ELMAR ricibi notificacion for di Meteo Aruba tocante un Ola di Calor cu ta bin, nan lo inmediatamente reprograma trabou grandi di mantencion pa un momento mas sigur y mas apropia despues cu e Ola di Calor a pasa.
E salud y seguridad di ELMAR su clientenan y su tecniconan ta primordial. Haci trabou di mantencion durante un Ola di Calor por trece riesgo grandi pa salud. Door di pospone e actividadnan aki durante e periodonan aki, ELMAR ta trata pa proteha tur hende involvi contra e efectonan negativo di temperatura halto.
ELMAR lo notifica clientenan den e area cu e trabou di mantencion ta cancela. “Uitschakelberichten” y cancelacion di “Uitschakelbericht” ta wordo distribui riba radio, riba ELMAR su paginanan di medionan social, den corant, y riba nan website.
Pa cualkier inkietud of mas informacion riba trabounan di mantencion binidero, por fabor bishita ELMAR su website na https://www.elmar.aw/safety-and-reporting/notifications-planned-work-outages/electricity-interruptions-due-planned-work of tuma contacto cu ELMAR su Team di Customer Service na customerservice@elmar.aw. ELMAR ta aprecia e comprension di nan clientenan ora nan implementa e medidanan di precaucion aki.