ORANJESTAD – Dia 1 di juli 2024, ta ultimo dia cu por entrega e plachinan di number di vehiculo di motor cu no ta den uzo. Si entrega e plachinan na tempo e contribuyente tin posibilidad cu e no tin mester di paga e impuesto pa un parti di aña 2024. E dispensacion di impuesto ta depende pa cuanto tempo e cliente ta laga e plachinan keda aden. Na e momentonan aki, dispensacion por ta posibel pa e di tres y cuater cuartal di
2024.
E condicionnan
Ta asina cu pa un vehiculo di motor cu no ta den uzo y cu no lo bay ta den uzo pa un tempo, no lo tin mester di paga e impuesto di un of mas kwartaal durante aña. Esaki ta dispensacion di impuesto y ta valido solamente si cumpli cu e siguiente condicionnan.
1. Ta entrega e plachinan di number no mas laat cu dia 1 di juli 2024
2. E plachinan di number ta keda aden pa por lo menos un kwartaal durante aña.
Entregamento di plachi di number
Por entrega e plachinan di number sea na oficina principal na Camacuri of na un MFA. Mester acudi cerca un cahero pa yena y firma un formulario. E formulario yama ‘Inleveren nummer- en controleplaat motorrijtuig’. Por haya e formulario aki tambe via e website di Departamento di Impuesto www.impuesto.aw.
Pa medio di e formulario ta declara cu ta entrega e plachinan y ta duna e motibo por ehempel: pa motibo di biahe largo, vehiculo ta daña etc.
Mirando cu dia 1 di juli 2024 ta ultimo dia pa haci pago di impuesto di vehiculo di motor, riba dianan 28 di juni y 1 di juli no ta posibel pa entrega e plachinan na oficina principal of un oficina den districto. Riba e fechanan aki mester acudi na e edificio anexo na Camacuri (oficina unda ta busca plachi di number), pa entrega e plachinan.
Periodo cu e plachi ta keda aden
E dispensacion di impuesto ta depende tambe di con largo un cliente ta laga su plachinan di number aden. Solamente si e plachinan a keda aden pa un kwartaal completo of pa un termino mas largo, e ora no lo tin mester di paga e impuesto di e kwartaal concerni. Por ehempel: si e vehiculo ta daña pa un luna so y e doño a busca e plachinan di number bek, e ora toch e mester paga e impuesto. E dispensacion no ta conta pa cada luna cu e plachi a keda aden, sino pa cada kwartaal di aña.
No tin dispensacion cu forsa retroactivo
No ta duna dispensacion di impuesto cu forsa retroactivo. Esaki ta pa motibo cu mester paga e impuesto delanta.
Gerencia di Departamento di Impuesto
18 di juni 2024
