E clausura lo inicia 6 or di atardi na Joe Laveist Sport Park na San Nicolas.

ORANJESTAD: E gran evento deportivo escolar ta yegando na su fin. Diasabra, 15 di juni, e clausura di Weganan Escolar 2024 lo tuma luga den Joe Laveist Sport Park den e curason di San Nicolas. E gran clausura lo inicia 6 or di atardi cu show di baile  y lo termina cu un tremendo wega di futbol di scol preparatorio. E anochi aki, e ekiponan di scol preparatorio lo enfrenta otro pa conkista e titulo di campeon. Na final di anochi, lo tin entregamento di premio na e scolnan cu mas a destaca durante e dos simannan di competencia di Weganan Escolar 2024. E aña aki 1300 alumno di 45 scol preperatorio, basico y secundario cu a cualifica ta competitiendo contra otro pa conkista e titulo maximo. E participantenan ta competiendo den diferente disciplina entre otro, beach tennis, volleyball, futbol, badminton, “kids athletics”, We Baile y We Mente. Minister Endy Croes y IBiSa ta invita e comunidad di Aruba pa bin presencia e final di futbol di scol preparatorio durante e gran clausura di Weganan Escolar 2024. Alabes, ta desea nos mucha- y hobennan hopi exito durante e competencianan deportivo di Weganan Escolar 2024.