Dia 19 di juni di 7’or pa 9’or di anochi ta tuma luga e lectura ‘The Political Culture of Caribbean Sovereignty’, den Auditorio di Museo Arqueologico Nacional Aruba – MANA. E lectura ta organisa pa e programa di investigacion ‘Island(er)s at the Helm’. E ta pa un y tur cu ta interesa den e tema menciona ariba.

Orador principal, Linden Lewis lo lidera e discusion riba asuntonan di soberania y su tendencianan (neo)colonial den Caribe. Lewis ta Profesor di Sociologia na Bucknell University y a scirbi extensivamente tocante asuntonan di sexo, rasa, trabou y globalisacion den Caribe. E ta e editor di ‘The Culture of Gender and Sexuality in the Caribbean’, co-editor di ‘Color, Hair and Bone: Race in the Twenty-first Century’, y editor di ‘Caribbean Sovereignty, Development and Democracy in an Age of Globalization’.

Dr. Lewis lo ser acompaña pa panelistanan Alissa Trotz y Anton Allahar. Alissa Trotz ta Profesor di Estudionan Caribense y e Director di Estudionan di e Ser Femenino y Sexo na Universidad di Toronto. Su area di investigacion ta inclui estudionan transnacional feminista, tradicion radical intelectual y violencia politico. Den añanan recien ela investiga tensionan geopolitico rond di extraccion di aceite crudo di Guyana. Anton Allahar ta Profesor di Sociologia na Universidad di Ontario West. Su trabou di investigacion ta enfoca riba sociologia, educacion, relacionnan di rasa, identidad Caribbense, politica y soberania. Su trabou mas recien ta investiga ideanan di democracia den e politica actual di Estados Unidos.

Isleñonan na Timon ta un proyecto di 5 aña den cual investigador- y partnernan di sociedad civil ta busca pa compronde con residente di e seis isla Caribense den Reino Hulandes ta enfrenta cu y ta adapta na cambionan climatologico.

Lecturanan publico, tayer, les- y sesionnan na scol a ser organisa desde 2021 cu partner na entre otro Aruba, Cursow, Boneiro y St. Maarten. Conseho Hulandes di Investigacion /‘Dutch Research Council’ ta financia e proyecto concerni cu ta ser organisa pa e ‘ Royal Insitute of Caribbean and South East Asian Studies’ (KITLV). KILTV ta un instituto di Academia Real di Ciencia/ Dutch Royal Academy of Sciences’ (KNAW).