![](https://www.awe24.com/wp-content/uploads/2024/06/IMG_20240608_020609-668x334.jpg?v=1717932678)
Diasabra madruga a drenta informe di un accidente basta serio riba e caminda principal di Oranjestad pa Sanicolas na altura di Aruba Bank Camacuri, mesora a dirigi tanto polis como ambulans na e sitio. Ta un ambulans ta e prome cu a yega ora ela topa cu e accidente cu a caba di pasa. Na yegada di e patruya a bin compronde cu aki ta trata di un accidente unda cu e Hyundai Accent bayendo pariba a bay pasa un fila di auto pero no a haya luga pa drenta bek y a bay dal semi frontal riba e Nissan Tiida di direccion contrario. Den ambos auto tabata tin 2 persona esunnan den e Accent a ser saca afo di e auto den e impacto y ta seriamente herida. Den e otro auto tanto e chauffeur como e dama pasahero tambe a resulta herida. E prome 3 ambulansnan a hiba e 3 victimanan mas grave pa hospital y ora un di nan a bira liber ela bolbe na e sitio pa busca e chauffeur di e Tiida. Mirando e gravedad di e accidente aki a solicita presencia di e investigadornan technico y forensico na e sitio pa cuminsa cu e investigacion.