![](https://www.awe24.com/wp-content/uploads/2024/06/DSC1982-668x334.jpg?v=1717640395)
ORANJESTAD: Diabierna ultimo, Trayecto di Preparacion pa Alfabetisacion na Papiamento a culmina den un manera festivo. Minister Endy Croes a acudi na John F. Kennedy Education Center Aruba, unda e maestronan a presenta tur material cu nan a desaroya durante e trayecto. Manera ta conoci, den cuadro di maneho di idioma nobo, lo introduci Alfabetisacion na Papiamento e aña escolar benidero. Esaki ta nifica cu desde aña escolar 2024-2025, e alumnonan di klas 1 di scol basico lo siña lesa y skirbi na Papiamento. Lo duna Hulandes cu un acercamento nobo cu ta pas mas den e contexto di nos muchanan. Alrededor di 50 maestro di klas 1 hunto cu 35 cabesante di scol basico na Aruba a haya seis (6) dia di estudio durante e trayecto di preparacion cu a inicia november 2023 y a culmina den e luna di mei di e aña aki. Durante e lesnan nan a trata: e metanan nucleo di idioma y comunicacion, conocemento di e material, didactica di idioma materno y didactica di idioma stranhero y dominio di Papiamento. Sra. Gina de Kort a indica cu e ta hopi orguyoso di e maestronan cu a haci tur nan esfuerso pa haci e introduccion di Papiamento posibel e aña escolar benidero. Sra. Anne-Marie Proveyer a expresa cu esaki sigur ta un stap hopi grandi den enseñansa di Aruba, den cual den futuro nos por bay mira su frutonan. Minister Endy Croes a gradici directora Sra. Anne-Marie Proveyer y Sra. Gina de kort di Departamento di Enseñansa Aruba y e facilitadonan cu a contribui den e gran proyecto aki. Alabes, ta felicita e maestronan cu a finalisa nan seis (6) dia di estudio pa e introduccion di Papiamento na tur klas 1 di scol basico na Aruba augustus benidero.