![](https://www.awe24.com/wp-content/uploads/2024/05/Untitled-7.jpg?v=1717076095)
Oranjestad: Aruba Volleyball Association a wordo invita pa “Trinidad and Tobago Olympic Committee” pa participa na e “U-19 Beach Volleyball Camp & Tournament” cu a tuma lugar na Tobago for di dia 23 te cu 26 di mei 2024.
Meta di e “Beach Volleyball Camp & Tournament” ta cu e hobennan bao 19 anja y nan entrenador ta haya e oportunidad unico pa ta parti di Clinicanan di Volleyball na unda nan por a desaroya nan abilidadnan y amplia nan conocemento den e deporte di Beachvolleyball duna door di e entrenadornan experencia di e Fédération Internationale de Volleyball (FIVB). Ta entrenadornan di Brazil, USA y Trinidad.
E oportunidad grandi aki a wordo crea pa Panam Sports atrabes di Comite Olimpico Arubano cu a apoya y cubri gran parti di e gastonan. E Proyecto aki di Panam Sports ta den cuadro di e Programma “Youth Athlete Preparation 2024”.
Aruba a wordo representa den e competencia Under-19 door di e atletanan talentoso Nayah Whitfield y Davy-Ann Eduards. Den e competencia aki cu ta e Beach Volleyball Tour di CAZOVA Aruba a wordo representa door di Joshua Hoepelman y Isram Phelipa. Den e weganan aki e atletanan Hoepelman y Phelipa a demostra karakter y persistencia y a duna bon bataya. Nan a sali venci pero nan abilidadnan a wordo reconoci pa e entrenadornan.
Atletanan Davy-Ann Eduards y Joshua Hoepelman a wordo reconoci di ta e dos (2) atletanan mas hoben (14 aña ) na e Development Camp y e Tournament. Nan a ricibi un reconocimento y elogio di e Presidente di Caribbean Zonal Volleyball Association (CAZOVA).
E hobennan a participa na e Volleyball Camp y e Tournament cu hopi entusiasmo y determinacion. E team di damas Nayah Whitfield y Davy-Ann Eduards a sobresali y a logra e medaya di Brons (3o lugar). Un logro grandi y bunita pe e atletanan di 14 y 16 aña den nan prome encuentro Internacional. Na e Volleyball Camp & Tournament aki a participa 10 Pais di Caribe: Cayman Islands, Trinidad & Tobago, Barbados, St, Lucia, St, Kitts & Nevis, Bahamas, Antigua & Barbuda, Grenada, British Virgin Islands y Aruba.
Un pabien grandi di Aruba Volleyball Association y danki na dirigente/ chaperonne cu a compaña e atletanan na e bunita evento aki.
Aruba Volleyball Association ta gradici CAZOVA, Comite Olimpico Arubano y muy especial sra. Nicole Hoevertsz y Stichting Sportsubsidie Aruba pa nan apoyo y sosten financiero.