![](https://www.awe24.com/wp-content/uploads/2024/05/7Z4A8013bb-668x334.jpg?v=1716859815)
Cu orguyo, Fundacion Cas Pa Comunidad Arubano (FCCA) ta anuncia e inauguracion oficial di su ultimo proyecto di vivienda, Residencia Blenchi, un compleho di apartamento destina na adultonan mayor di 55 aña bay ariba. E ceremonia a tuma luga na Boegoeroei 11z, dia 24 di mei 2024, bou presencia di miembronan di Parlamento, Ministernan, incluyendo nos Minister di Finansas y Cultura, Sra. Xiomara Maduro, Minister di Transporte, Integridad, Naturalesa y Adultonan Mayor, Sr. Ursell Arends, trahadonan di FCCA, y otro invitadonan special.
E necesidad pa vivienda accesibel y pagabel ta creciendo constantemente den nos comunidad, di cual un grupo grandi ta consisti di nos adultonan mayor. Segun e informacion di FCCA, alrededor di 49% di persona ariba nan lista di espera ta consisti di adultonan mayor di 55 aña bay ariba y 79% di e personanan aki ta pidi pa un apartamento di 1 camber. Como cu e proyecto ta trata di un renobacion di un Compleho di apartamento pa studiante, FCCA por a converti esaki relativamente lihe y na un costo rasonabel den 48 apartamento di un ‘slaapkamer’.
Esaki no ta e prome proyecto cu FCCA ta dedica na e grupo aki den nos comunidad. Nan tin 5 otro bario asina caba, cual ta situa na Savaneta, Cunucu Abou, Paradera (Santa Filomena), Avicena straat, y Jaburibari. Residencia Blenchi no solamente ta ofrece e oportunidad pa engrandece e oferta di vivienda, pero tambe ta ekipa cu facilidadnan pa duna e habitantenan un estilo di bida trankil y agradabel.
Na e inauguracion, Sra. Julie Wever, Director Tecnico & Comercial di FCCA, a expresa su gratitud na tur esnan cu a contribui na e exito di e proyecto. “Nos no por logra e meta aki sin e esfuerzo di nos ‘stakeholders’, manera nos contratista y su ekipo, y mas importante e dedicacion di e empleadonan na FCCA. Boso ta e base di nos exito, y pa esaki, nos ta sumamente agradeci,” Sra. Wever a bisa.
Minister Xiomara Maduro y Minister Ursell Arends tambe a hiba palabra di aprecio durante e ceremonia, enfatisando e importancia di proyectonan manera Residencia Blenchi pa mehora e calidad di bida di nos grandinan y pa yuda construi un comunidad mas prospero.
“FCCA ta traha duro pa un futuro unda cada miembro di nos comunidad por biba cu dignidad y seguridad. Den e 45 añanan di nos existencia, nos a logra yuda mas cu 20.000 famia yega na nan propio cas. Nos ta dedica pa sigui crece y inova pa por sigui yuda mas hende cu vivienda, construyendo un Aruba mas fuerte y uni,” Sra. Wever ta conclui.
Fundacion Cas Pa Comunidad Arubano (FCCA), estableci na 1979, ta ofrece servicionan financiero y di “real estate,” manera financiamento hipotecario, benta di tereno y huur di propiedadnan. E mision di e fundacion ta pa desaroya y construi viviendanan accesibel, eficiente, y duradero pa atende e necesidad di casnan social den nos comunidad. Ademas, e fundacion ta dedica na crea barionan cu un ambiente positivo y sano, promoviendo e bienestar di su habitantenan.