ORANJESTAD: Diabierna ultimo, Minister di Enseñansa y Deporte Endy Croes hunto cu Prome Minister Evelyn Wever-Croes, Minister Dangui Oduber, Parlamentario Ricky Hoek, Hendrik Tevreden y Setty Christiaans-Yarzagaray a asisti na STEPS 2023, cual a tuma luga den e ballroom di Hyatt Place Aruba Airport.  Durante e ocasion aki, e profesionalnan di DVG a presenta e resultadonan di e encuesta STEPS 2023. Departamento di Salud Publico (DVG) tabata encarga cu e investigacion aki, bou di supervision di Pan American Health Organisation (PAHO). A base di e resultado di investigacion, ta indica cu 79% di e poblacion ta sobrepeso y 46% ta obeso, 24% di nos poblacion ta sufri di presion halto, di cual 9% ta hobennan entre edad di 18-29 aña y 38% di e populacion ta na riesgo pa haya un malesa cronico. Ministerio di Salud Publico y DVG ta implementando diferente strategia pa desminui e porcentahe di obesidad. Ministerio di Deporte ta trahando riba un plan pa intensiva programanan deportivo y informativo pa por preveni y yuda baha e porcentahe halto aki. Minister Endy Croes ta encurasha Pueblo di Aruba pa come saludabel y practica deporte. Actividad fisico ta desminui e posibilidadnan di desaroya malesanan cronico. “Ban ta consciente y cuida nos salud”, e mandatario di Deporte ta conclui.