ORANJESTAD – Riba 17 di mei ultimo, Departamento di Asuntonan Economico, Comercio y Industria mediante su unit Iniciativa pa Desaroyo di Empresa Arubano (IDEA), a culmina e proyecto di “Sport Entrepreneurship” cu un bunita ceremonia di entregamento di certificado na e participantenan. Esaki a tuma luga den presencia di Minister di Economia, Comunicacion y Desaroyo Sostenibel, sr. Geoffrey Wever; Minister di Enseñansa y Deporte, sr. Endy Croes; Vicepresidente di Comitee Olimpico Internacional, sra. Nicole Hoevertsz, y tambe Directora Suplente di Departamento di Asuntonan Economico, srta. Judesca Briceño.

E tayernan aki a inicia dia 30 oktober 2023 y a culmina dia 26 februari 2024 y tawata bou di coordinacion di Departamento di Asuntonan Economico, Comercio y Industria mediante su unit Iniciativa pa Desaroyo di Empresa Arubano (IDEA), cu colaboracion di Ministerio di Economia, Comunicacion y Desaroyo Sostenibel y Ministerio di Enseñansa y Deporte.

Desde aña 2012, e unit IDEA ta ofrece tayernan riba diferente topico cu e meta pa capacita nos comerciantenan chikito y duna nan e hermentnan necesario pa por ta exitoso. Igualmente ta importante pa nos comerciantenan formalisa nan negoshi y asina reduci economia informal na Aruba. Cu e tayernan aki di IDEA, nos ta comparti cu esnan cu kier bira un comerciante, e informacionnan y conocemento necesario pa start un negoshi.

E tayernan di Sport Entrepreneurship tawata specialmente dedica na tur esnan cu ta desea di dedica na un actividad di deporte den un forma comercial. E tayer a delinea un iniciativa strategico pa promove actividadnan comercial den deporte door di cultiva un cultura caminda deporte y negoshi por crusa otro. Door di a crea un serie di tayernan dirigi pa interesadonan den e industria aki, e proyecto aki tawata tin como meta pa sostene un grupo cu tin entusiasmo den e industria di deporte cu ta cla pa haci un impacto riba economia di Aruba y den region. E meta di e proyecto aki tawata pa e personanan haya e materia, conocemento, y mentalidad necesario pa haci nan pasion den deporte crece y haci di esaki un actividad comercial exitoso. Door di promove innovacion, crecemento economico, y un desaroyo di capacidad profesional, e proyecto aki por contribui na e evolucion di e industria deportivo y crea un panorama mas dinamico y vibrante pa negoshinan relaciona cu deporte.

Den e proyecto aki a splika kiko Sport Entrepreneurship ta encera, su alcance y e tendencianan actual den e industria aki. A trata e diferente manera cu por identifica oportunidadnan di negoshi den e industria deportivo. E participantenan a siña con pa crea un plan di mercadeo y di benta pa nan negoshi relaciona cu deporte. A trata tur loke ta relaciona cu e maneho di financia den un negoshi, incluyendo presupuesto, pronostico, y recordnan financiero. A haci un repaso completo di asuntonan legal y etico relaciona cu Sport Entrepreneurship. Tambe a trata e uzo di tecnologia y innovacion. A pone enfasis riba habilidadnan di liderazgo y ehercicio di teambuilding pa yuda e participantenan crece den nan negoshi. A trata e importancia di sostenibilidad y responsabilidad di medio ambiente den Sport Entrepreneurship. Na final e participantenan a desaroya e conocemento y habilidadnan necesario pa integra e oportunidadnan di turismo deportivo den nan proyectonan di Sport Entrepreneurship. Esaki por inclui, start un agencia di biahe pa deporte, organisa eventonan pa turista relaciona cu deporte, of promove eventonan deportivo como atraccion pa turista.

IDEA a selecciona un team di experto prominente pa nos tayernan. Cada facilitador ta un lider den nan tereno, algun di nan tin experencia den maneha innovacion y tin exito den entrepreneurship den deporte. E team aki a inclui expertonan for di diferente Departamento di Gobierno di Aruba, instituto y sector priva. E combinacion diverso di nan background a trece conocemento amplio y completo den nos tayernan.

Durante e serie di workshop, un total di 18 participante a inverti nan esfuerzo pa traha riba nan capacidadnan empresarial den e ramo di deporte. Di e 18 participantenan, un total di 13 persona a logra e certficado, demostrando nan dedicacion cu nan a participa na 70% di e workshopnan of mas. Ademas, tin 5 otro participante cu a logra un parti di nan participacion di entre 50% y 68%.

Dos participante a logra participa 100% na e proyecto. Nan a participa na tur e 9 topiconan di e workshopnan, cu ta encera un total di 18 diferente workshop, durante un periodo di 22 dia di tayer. Nan nomber ta sr. Jeremy Boekhoudt di ‘Sports4U Triathlon Academy’ y sra. Niurca Vrolijk di ‘Cemedar Centro Medico Deportivo Aruba’.
E participantenan cu a ricibi nan certificado y transcript, ta e siguiente:
Veronica Camara, Monica Pimentel, Giovanni Bermudez, Alexis Sierra, Naomi Vrolijk, Eugene Farro, Dillon Willems, Donovan Millan, Francis Maduro, Niurca (Gina) Vrolijk, Dokter Ricardo Vargas, Adrick Croes, Michael (Glennon) Eights, Ashwin Laaf, Jeremy Boekhoudt, J.A. Albee de Sousa Fernandes Perna, Rosemarie Maduro y Darwin Rogders.

Mientras tanto cu IDEA ta explora den e industria deportivo, nos ta mira un futuro unda innovacion y crecemento economico ta crusa otro y ta forma un parti integral den e mundo di deporte. E proyecto aki no solamente ta pa fortalece e participantenan, pero tambe pa duna un aporte significante na prosperidad economico di nos pais Aruba. Door di fomenta entrepreneurship, promove colaboracion, y cultiva perspectivanan fresco. Nos Gobierno tin como meta pa haci un impacto duradero tanto riba e industria deportivo como riba economia en general.
Un biaha mas pabien y hopi exito na tur cu a logra completa e tayernan di Sport Entrepreneurship.