ORANJESTAD: Diabierna 19 di april 2024, den e prestigioso ballroom di Renaissance Convention Center a tuma luga Premio Excelencia den Deporte 2023, unda a rindi homenahe na dies (10) baluarte deportivo cu a contribui gran parti di nan bida den e desaroyo di deporte di Aruba. Sr. Demetrio Werleman, miho conoci como Meto, a ricibi reconocemento di Baluarte den Deporte di Prome Minister Evelyn Wever- Croes y Minister Endy Croes. Sr. Meto ta forma parti di e ekipo di Don Flip Racing. Desde un edad hoben, Sr. Meto su pasion pa drag race a cuminsa. Sr. Meto a conta cu el a haya un motor di auto di drag race regalo y desde e tempo ey e chispa pa drag race a start. Sr. Meto hunto cu su rumannan ta participa activamente den e deporte di drag race tanto na Aruba como na Curaçao. Minister Endy Croes ta gradici Sr. Meto Werleman pa contribui den e desaroyo di deporte di Aruba y ta felicit’e cu su reconocemento bon mereci.