ORANJESTAD: Recientemente, durante Conferencia di Prensa di Gobierno di Aruba, Minister di Enseñansa y Deporte Endy Croes a informa cu e proyecto di renobacion di e pista di Palo Marga a inicia. Manera ta conoci, desde aña 2023 a aloca 26 poste di luz ultramoderno LED light di marca Philips, cual tabata un inversion di 450 mil florin. Aña pasa juli, e mandatario di Deporte a priminti cu den 2024 lo aloca fondo suficiente pa e renobacion di e pista pa cumpli cu e standardnan internacional, cual tambe tabata un prioridad. Pa esaki, a trece Sr. Kurt Johnson di Total Venue Concepts, un profesional den e preparacion di pista di drag racing na Merca. Lo uza un mix special pa e pista, esta “race quality asphalt”. A percura pa e fondonan yega pa realisa e proyecto di Palo Marga, pa cumpli cu e condicionnan internacional y tin un pista certifica pa e proximo 15 añanan. Na Aruba no tin tur ekipo, sinembargo a traves di e contactonan di Sr. Kurt Johnson a ricibi un oferta adicional pa complimenta e proyecto aki. Ademas di esaki, AWM a trece un experto di Hulanda pa segura cu e asfalt lo wordo basha na un nivel halto, ya cu pa e pista wordo certifica ta papia di tolerancianan di milimeter. Banda di esaki, C2 ta un di e otro companianan cu tambe tabata responsabel pa e renobacion di e pista. Diabierna ulitmo, C2 a basha e ultimo fase di concreto y a entrega e proyecto na ABM na tempo. Minister Endy Croes a informa durante conferencia di prensa cu e asfalt a wordo basha caba. Un proyecto grandi di alrededor 1.9 miyon florin. Minister Endy Croes a indica cu ta planifica pa e proyecto ta completamente finalisa pa fin di mei di e aña aki.