ORANJESTAD – E asamblea general di Nacionnan Uni a proclama 22 di april como Dia Internacional di Mama Tera. Esaki, nan a haci’e pa medio di un resolucion firma na 2009. E fecha aki ta reconoce e ecosistemanan di e planeta Tera, cu ta e luga di biba di humanidad y cu mester di proteccion pa asina engrandece hende su bienestar, combati cambio di clima y tambe stop e biodiversidad di bay perdi. Aki na Aruba DNM tambe ta reconoce e urgencia pa haci mas y duna un voz na e naturalesa, Mama Tera.

Cambio di clima, cambionan cu hende a duna naturalesa, crimennan cu a trece inbalance den e biodiversidad manera kapmento of rosamento di mondinan, cambio di uzo di tera, agricultura intensivo, y produccion di cria di bestia, y e intercambio ilegal di bestia salvahe, ta acelera e destruccion di e planeta riba un escala grandi.

Mama tera ta urgi accion necesario cu ta pa haci un cambio pa ta mas sostenibel y move rapidamente pa un economia circular y sostenibel cu ta traha mihor pa hende y e planeta. Proteccion di e planeta ta responsabilidad di un y tur. Ora ta papia di dia di Mama Tera ta referi na eleva conscientisacion di e menasanan cu e planeta su bienestar ta enfrenta y e bida cu e planeta ta sostene.

Manera e declaracion di Rio na 1992 ta promove, cu naturalesa den harmonia y balans cu economia, aspectonan social y di medio ambiente pa e necesidad di generacion actual y esun di futuro. E dia aki ta pa encurasha hende pa haci mihor pa e planeta, pa tuma accion pa alivia e planeta di tanto daño y compromete na un ambiente limpi y mas mata planta.

Nos no ta papia suficiente di e planeta fascinante cu nos ta habita pero esaki ta e oportunidad cu nos ta haya pa engrandece nos conocemento y siña con nos planeta a yega na existi y kico tur ta haciendo e daño.

Nebula solar, cu ta manera un disco cu coleccion di stof/tera y gasnan cu a keda atras despues di e nacemento di solo cu tambe a crea e resto di e sistema solar. Tur esaki a sosode 4.5 miyon di aña pasa. Planeta Tera, e di tres planeta for di solo, ta e unico luga den atmosfera na unda ta confirma di tin bida. Planeta Tera ta e di seis planeta mas grandi den e sistema solar. Tur otro planeta den sistema solar a haya nomber di un Dios Romano of un Dios Griego. Pero cierto cultura a defini nos mundo, pa algun mil di aña caba, usando e palabra ‘Earth’ deriva di hendenan Germanico cu simplemente ta nifica, Tera.

DNM cu ta contribui na e conscientisacion di e temanan aki ta hay’e sumamente importante pa pueblo tuma accion y yuda nos planeta p’e keda uno den bon condicion, saludabel pa generacionnan cu ta bin. P’esey tambe DNM ta propone pa tur aporta den un manera of otro. Aki ta sigui algun sugerencia di accionnan cu por tuma.

Accion gubernamental. Formulacion di un maneho cu ta compromete na proteccion di e medio ambiente. Esaki tambe ta e caso cu e bishita di agencia di consulta cu TwyndraGudee cu diferente ‘stakeholders’ pa yega na e National Biodiversity Strategic Accion Plan (NBSAP), en corto e Nature Ploicy. Esnan di consulta lo formula hunto cu DNM e maneho pa e siguiente seis añanan. Esaki ta e intencion cu na juni lo prepara hunto cu Hulanda pa bay reunionan di COP18, cu ta den conexion cu e Convention of Biological Diversity.

Accionnan educacional por encera eleva conscientisacion tocante biodiversidad, esfuersonan di conservacion  y tambe accionnan individual pa sostenibilidad.

Accionnan di comunidad por encera plantamento di mata hunto (Ban lanta y Planta), accion di limpiesa (Limpi Limpi) y encuentro di trabou cu ta educacional.

Cada un di nos por tuma e reto y dicidi pa adopta practicanan den bida diario pa reduci desperdicio/ sushedad, conserva enrgia (no mal uza) y scoge productonan cu ta amical pa medio ambiente. Ta hunto nos por logra. Dia Internacional di Mama Tera ta sirbi pa un comienso y direccion di accion colectivo cu ta nifica hopi pa cu proteccion di e planeta y crea un futuro sostenibel.