Prome cu tur cos nos mester recorda pueblo di e actonan di Mike Eman pa nunca, pero nunca mas pueblo duna AVP un voto di confiansa. E solo echo cu AVP a ABUSA di e confiansa cu pueblo a yega di dun’e na aña 2009 y 2013 no por ripiti. Nos lo percura pa keda recorda pueblo di e berdadero cara di AVP.
Prohibi pa lubida e logronan di AVP:
Algun logronan di AVP y Mike Eman durante nan gobernacion di e periodo 2009-2017, cual pueblo hamas por lubida ta entre otro, e logro grandi di Mike Eman y AVP kendenan a presta 2200 mil miyon den 8 aña sin cu tabata tin un pandemia na mundo redoblando asina e debe di Pais Aruba pa conkista e medaya di oro y e apodo “Mega Debe di AVP”. Mike Eman y AVP a logra e interes record pa Pais Aruba di 260 miyon pa aña riba e placanan cu gobierno di AVP a presta. Fruta di e Mega Debe! Danki Mike Eman. Interes di 260 miyon florin pa aña ta igual na 712 mil florin tur tur dia, 365 dia pa aña cu e pueblo aki mester paga. Masha danki Mike Eman! (Pensionadonan tene boso curason). Cu e logro aki Mike Eman a expresa den Parlamento di Aruba lo siguiente: “Mi ta orguyoso di e debe y e debe t’ey pa henter pueblo bay pag’e.” Na aña 2050 nos lo caba di paga e debe di Mike Eman, pues a mara 6 termino di gobernacion pa paga e debe di Mike Eman y AVP. Ki sentimento di orguyo di Mike Eman y AVP despues di a desgracia e finansas di Pais Aruba. Mike Eman y AVP a logra bin cu e ley di LAFT pa Aruba (2015). Mike Eman y AVP a logra ranca y chica 201 miyon florin di nos companianan estatal, poniendo e companianan aki den un posicion financiero hopi debil. Mike Eman y AVP a logra Hedge WEB, cual desicion cu a costa pueblo y WEB 300 miyon. (Puntra Mike de Meza). AVP y Mike Eman a logra regala Richard Arends un ex–minister y e brain di AVP a traves di su compania “Horizon Consultancy” un bunita suma di 4 miyon florin mas un tereno na Malmok. AVP y Mike Eman a logra regala e portabosnan di AVP, esta Speed Andrade Patrick Paskel, un bunita suma di 8 miyon florin pa haci propaganda pa gobierno di AVP 8 aña largo (bida dushi a caba). AVP y Mike Eman a logra corumpi y “mafia” RDA 20 miyon florin. (Rapport Forensico ta na Ministerio Publico en espera accion). AVP y Mike Eman a logra regala Patricia Dowers, casa di Arthur Dowers, 400 mil florin pa duna conseho(puntra Athur Dowers y lag’e splica dicon esaki si por). AVP y Mike Eman a logra regala abogado Sjiemfat 5 miyon florin di pagado di belasting pa duna conseho (puntra Mike Eman dicon esaki si por). Mike Eman y AVP a logra regala su ruman 1.9 miyon pa 1 auto di careda (Team Aruba, puntra Mike). Mas logro di Mike Eman y AVP, kendenan a brasa corupcion pagando Paul Croes ful un salario di minister pa 3 luna largo, mientras Paul tabata cera den KIA. Awe veredicto y sentencia den caso IBIS ta conoci. Mike Eman y AVP a brasa Benny Sevinger, kende tin veredicto di prison “strafrechterlijk” riba su cabes den caso AVESTRUZ. Mike Eman a yama votadonan bay celebra na cas di partido momento e veredicto di prison a cay pa Benny. Mike Eman y AVP a logra cu Benny Sevinger un convicto ta cobrando 10 mil pa luna den Parlamento di Aruba. Mike Eman y AVP a logra un bunita rapport di Algemene Rekenkamer bou di e nomber Bo Aruba 2018, unda a divulga e corupcion di 1.6 biyon florin. Mike Eman y AVP a logra pone 147 hende riba payroll di un solo minister, esta ex–Prome Minister Mike Eman. Cu luz di trafico mester a cana den Cocolishi e tempo aya. Pues e “Mafia Partij” AVP y su amigonan ta bon conoci pa su casonan bochornoso y esaki hamas pueblo kier pa ripiti. Tur ta cu prueba! Prohibi pa lubida.
Un voto pa AVP ta un voto pa un partido di bandido:
Refrescando memoria di pueblo riba locual Mike Eman y AVP a haci cu e pais aki. P’esey un hoben studia na su sano huicio nunca, pero nunca por permiti su mes subi lista di AVP pa e proximo eleccion. Lista di bandido y corupcion. Pueblo votado tambe lo percura pa nunca, pero nunca mas hendenan cu mentalidad manera Mike Eman y AVP bini na poder pa caba di desostra e pida baranca aki cu yama Aruba. Aruba merece trankilidad pa por sigui crece y mehora. Gobierno di MEP a demostra un bes mas cu tin e capacidad– y competencianan necesario bou liderasgo cu vision pa sigui saca e pais aki padilanti!
