Despues di scucha discurso di Mike Eman ta bisto cu e ta lidera e atachamento y acusacionnan dirigi na Ministerio Publico. Nos a tuma nota cu sr. Candelaria (ex-alto inspector di polis) a haci un apelacion pa no preciona Ministerio Publico y pa su siguiente dia Mike Eman ta sali y atacha e bon nomber di Ministerio Publico. Esaki ta sumamente preocupante pa nos estado di derecho y un pais democratico.
NOTICIACLA 24 APRIL 2019
Den un entrevista cu Noticiacla e ex-Procurador General A. Van Dam a splica cu nan ta investigando mas caso ala estilo “IBIS”. Un caso den cual a investiga corrupcion bou Gabinete Eman II. E a splica tambe cu e informacion cu nan ta husando ta informacion cu nan a obtene for di caso “IBIS”.
RELATO DI PRENSA DI MINISTERIO PUBLICO
Segun e relato di prensa di Ministerio Publico ta trata un investigacion penal di Landsrecherche na posibel delitonan di corrupcion y otro hechonan castigabel posiblemente cu otorgamento di terenonan di gobierno. Mas concretamente: e investigacion ta dirigi riba e pregunta si un of mas compania a obtene a base robez (un opcion riba) derechonan di erfpacht di terenonan di Pais Aruba den e anjanan 2009 te 2017. Ademas ta investiga e rol di un minister anterior.
PRECION RIBA CADENA HUDICIAL
Mi ta lamenta profundamente declaracion di Dowers, den cual e ta cuestiona, e profesionalismo di nos Procurador General. E Procurador General cu a wordo nombra tempo cu e mes ta Minister. Mike Eman tambe ta sali ataca y cuestiona e weso di lomba di nos Procurador General. Esaki ta algo condenabel y preocupante.
Candelaria a declara cu e ta confia nos aparato Hudicial por escrito. Su palabranan literalmente: “Permitimi confirma mi confiansa total den nos aparato hudicial, pasobra mi a bin di eynan, mi a traha eyden” (Candelaria, 6 oktober 2019). P’esey ta lamentable cu pa su mayan e ta para banda di Mike Eman Y Arthur Dowers y lage atacha e credibilidad di e cadena Hudicial.
PA CONCLUI
Mi no ta bay cay den e wega politico pa papia di e desaster cu Mike Eman a crea pa loke ta nos finansas publico, autonomia, economia y e crisis social. Pasobra ta esey nan kier pa desvia atencion di e di dos caso di corrupcion bou Gabinete Mike Eman.
Nos ta sumamente preocupa cu e atakenan fuerte di Mike Eman contra e aparato Hudicial. Segun Mike Eman mes a declara: “Ministerio publico tin e monopolio ariba persecucion di ciudadanonan di nos pais” (conferencia di prensa na cas di partido AVP, 8 oktober 2019). Kiermen segun Mike Eman mes, kinan hamas por ta trata un caso di persecucion politico.
