Aruba Tourism Authority (A.T.A.) conhuntamente cu socionan un biaha mas a demostra compromiso pa promove e destino como un alternativa di destinacion atractivo. ITB a conta cu 5000 Expositor representando 170 pais. E aña aki, e delegacion di Aruba a consisti di 30 representante di; A.T.A., Asociacion di Hotel y Turismo di Aruba (AHATA), dies hotel, y DMC.

 

E dianan prome cu e feria, entre otro CEO di A.T.A. Ronella Croes y Director di A.T.A. Europa Tirso Tromp a reuni cu socionan y representantenan y a delibera riba topiconan clave cu ta inclui sentimento di mercado, produccion di operadornan turistico y reservacionnan, evaluacion strategico, y repaso di plan di accion. Aki reconociendo e retonan enfrenta door di e mercado Europeo, incluyendo competencia intensifica y costo di biahe pa Aruba creciente, esaki den e contexto cu pa Europa Aruba ta un destino “longhaul”.

 

Durante di e feria, a sostene reunion nan y a encontra cu medionan di comunicacion di e mercado Europeo. E reunion nan tabata cu esnan cu ta produsi negoshi pa Aruba esta tour operadornan y aereolinia di varios pais den Europa.

 

A reuni cu aerolinea KLM kende a confirma biahe diario pa Aruba den 2024. Banda di e mercado principal cu ta Hulanda, lo enfoca aun mas riba paisnan manera Alemania y Italia cu ta dos mercado cu ainda tin espacio pa aumenta e cantidad di turista afluente desde Europa pa Aruba. A.T.A. y KLM lo percura pa lansa campañanan cu un ‘timing’ specifico pa yuda stimula algun luna den e aña cu ta desea di pusha, esaki ta inclui periodo di zomer. A identifica crecemento positivo di e Mercado Suizo cu ta uno chiquito pero cu hopi poder di adquisición y cu ta impresiona cu e producto di Aruba. Como parti di e strategia aki a reuni cu operador di vuelo potencial, como tambe tour opedarnan clave.

 

A reuni cu TUI Group, cu ta responsabel pa bende e mercado di Aruba na Hulanda, Belgica, Inglatera y Alemania. A elabora riba cambio den e business model di varios hotel na Aruba cu ta opera segun sistema Dynamic Rates y sistema di benta digital “Direct Connect”, compara cu e Allotment contracts tradicional. TUI, e tour operador di mas grandi pa Aruba desde Europa, a palabra riba asistencia di transicion di e business model como beneficio mutuo. Tambe a dialoga riba e vuelonan di TUI pa Aruba for di e mercado Hulandes.

Tambe a reuni cu e socio mas grandi pa Aruba, esta VING, cu ta representa e mercado Nordico  (Suecia, Noruega, Dinamarca y Finlandia). Mescos cu e mercado di Suiza, e bishitante Nordico ta pone hopi enfasis riba seguridad y nivel di servicio. VING a confirma cu den e ultimo dos decadanan, Aruba a logra un posicionamento hopi fuerte den Suecia.

 

Alabes a reuni cu tres operadornan turistico principal di Italia, esta Alpitur Group, Naar, y Idee per Viagiarre. A.T.A. a informa cada operador cu tin vuelonan nobo desde Lima na Peru y Medellin na Colombia, mirando cu e bishitante Italiano ta mastanto combina dos pais, esta Aruba cu Merca. E opcion di Aruba cu Peru of cu Colombia ta opcionnan atractivo pa e Italiano.

 

A base di e desaroyo nobo den conectividad di Latino America y Norte America, A.T.A. conhuntamente  cu e agencia di representashon nobo na Alemania, LMG Management, a reuni cu algun tour operador nobo cu a keda entusiasma cu e posibilidad di ruta nobo pa crea productonan adicional pa e bishitante.

 

Aruba ta sali for di e feria ITB Berlin 2024 exitosamente y determina pa sigui fortalece su posicion como un destinacion preferí pa turistanan di Europa y mundo.

 

Fundacion Betico Croes ta organiza 18 Maart Celebración di dia di Himno y Bandera riba plaza Status Aparte na Sta. Cruz. pic.twitter.com/c4AiGzr3h6

— awe24.com (@AWE24) March 3, 2024