Stichting Hunto ta oficialmente un realidad: Un simbolo di sepransa y inovacion pa Aruba

 

ORANJESTAD –Salud di nos comunidad no ta wordo midi solamente pa e bienestar fisico di su miembronan, pero tambe pa e forsa di su sosten pa esnan cu ta enfrentando desafionan di salud mental y adiccion. Stichting HUNTO ta un bon ehempel di locual nos por logra hunto y nos tin pleno confiansa cu su impacto lo wordo sinti pa e generacionnan cu ta bin.

Laga nos sigui for di aki cu e compromiso pa sigui sostene, eleva, y cuida cada miembro di nos comunidad, sigurando cu e portanan di Stichting HUNTO no ta djis un entrada di un edificio mas, pero un portal pa un futuro mas saludabel y prospero pa un y tur.

 

Diahuebs atardi, nos a marca un paso significativo den e trabounan continuo pa un enfoke mas compasivo, inclusivo y efectivo pa cu cuido di salud mental aki na Aruba. Minister di Husticia y Asuntonan Social sr. Rocco Tjon y Gabinete Wever-Croes II ta haciendo loke hopi politico den pasado no a hasi, inverti den prevencion. E beneficio di e proyectonan aki no solamente ta pa e clientenan actual, pero nan lo conoce un impacto grandi riba destino di nos futuro generacionan.

 

Pa hopi aña e desafionan di salud mental a domina grandemente den nos comunidad, hopi biaha man den man cu silencio, stigma y escasez di recursonan. E apertura di Stichting HUNTO no solamente ta simbolisa e integracion fisico di locual ta psikiatria y tratamento di adiccion bou di un solo dak, pero tambe ta muestra di nos compromiso colectivo pa kibra e bareranan existente pa cu esakinan. E iniciativa aki, cual ta alinea cu e maneho di Ministerio di Husticia y Asuntonan Social, pa mehora accesibilidad pa servicionan di salud mental, ta yuda tambe pa trata e listanan largo di espera cu tin, sigurando cu e yudansa ta disponibel pa esanan den necesidad na momento cu mas nan tin mester di esaki.

 

Cu e inauguracion di Stichgint HUNTO, nos ta para keto pa reconoce e lucha cu esnan cu ta enfrentando problemanan di salud mental y adiccion ta pasando aden. Nos ta reconoce e curashi inmenso cu e ta tuma pa busca ayudo y e resiliencia pa supera e desafionan aki. Stichting HUNTO ta para como un testimonio cu salud mental ta un parti integral di salud general y cu merece e mesun atencion, cuido y recursonan manera cualkier otro aspecto di nos bienestar.