Calabas/Kudawecha – Team Snor ta bou un racha di victoria! Un pa un cu enfrenta Team Snor den e tempo aki ta parce ta destina pa “bite the dust”! Diasabra ultimo, 17 di februari, e mundialmente conoci Domino Square Garden na Calabas / Kudawecha tabata testigo un biaha mas con duro e ekipo bou liderazgo di ‘Snor’ Perez y Captain Magda a bira ultimo tempo.
E team di Bou Palo Boys a ranca sali yen di brio, y te hasta na dado momento a sa di pasa nada menos cu Dr. Tico Dirksz y Roy Sneek un sapato blanco! Cos ta sigui pareu pareu, te cu Snor a dicidi di cuminsa hala cos mara y pika bay dilanti te na 11-7, caminda cu Wilson y patna a debolbe e sapato blanco na Bou Palo. Halftime manera semper ta un fiesta di snack completamente gratis cortesia di chef Han, y poco rato despues di dos mita ta cuminsa. Bou Palo Boys ta habri e segunda tanda cu forsa y ta kruip yega cerca te 10-11, pero aki Snor ta habri valve atrobe y ta pika bay dilanti te na 14-10!
Bou Palo Boys ta habri ofensivo fuerte y ta corta bentaha bek te na 12-14! Snor ta bolbe trapa trot y bay te 17-12. Sinembargo, Bou Palo Boys ta bolbe haci un otro intento masal y ta yega cerca cu 17-18! Pero aki Snor ta dicidi cu ‘het was leuk geweest’ y ta claba porta cera style di exorcista cu ta core cu diabel! Team Snor un biaha mas victorioso den un tremendo wega, caminda su contrincante a duna todo por todo!
