Riba 24 di januari a celebra Dia Internacional di Educacion, pues ki miho momento pa anuncia na coleganan di hospital via canalnan interno cu Horacio Oduber Hospital (HOH) a caba di ricibi acreditacion como un organisacion di educacion, esta ‘leerbedrijf’ duna pa “Samenwerkingsorganisatie Beroepsonderwijs Bedrijfsleven” (SBB). SBB tin e responsabilidad pa ehecuta e leynan di educacion y formacion di trabou na Hulanda. Studiantenan di e nivel M.B.O. pa ley mester sigui nan parti practico di nan estudio na un organisacion di estudio acredita, cu ta conoci como ‘beroepspraktijkvorming’ (bpv).  Pues, un tremendo logro cu ta pone hospital riba mapa pa studiantenan di Hulanda cu e nivel di M.B.O awo tambe por bin Aruba pa core staga na HOH.

 

“Mi ta hopi contento y agradicido na team di HOH Academy y tur otro departamento cu a contribui pa logra e acreditacion aki cu ta habri mas porta pa nos como HOH y Aruba,” miembro di Hunta di Directiva, sr. Gregory Croeze a expresa. Un pabien grandi ta bay pa departamento di HOH Academy cu a haci esaki posibel.

E departamento HOH Academy ta hunga un rol crucial den stimula un educacion continuo, cual ta coresponde cu un di e puntonan fundamental di hospital. HOH Academy ta percura pe studiantenan cu mester core stage tin un luga adecua pa practica y compaña pa un guia profesional den hospital.

“E proceso pa haya acreditacion a cuminsa na januari aña pasa unda cu a mira kico mester haci of drecha pa cumpli cu tur exigencia. Entre otro cu e studiante ta safe y cu nos tin tur cos den cas cu e studiante mester manera por ehempel material y un bon guia durante nan stage como organisacion profesional. Tur e ‘stagebegeleiders’ y supervisornan di trabou den HOH a aporta grandemente durante e trayecto pa logra acreditacion como organisacion di estudio. Nos como HOH Academy ta aprecia masha hopi mes boso dedicacion y guia cu a hunga un rol esencial den e proceso exitoso aki,’ segun Coordinador di stage, Cathleen Gomez-Hernandez.

 

Actualmente HOH tin acreditacion pe siguiente estudionan: Assistant Business Services, nivel 2, crebo 25724; Allround Assistant Business Services, nivel 3, crebo 25723; Asistente Farmaceutico, nivel 4, crebo 25650 y Enfermeria, nivel 4, crebo 25655. Ademas, ya caba ta den e proceso di acreditacion pa loke ta Medisch electronica y ICT.

 

HOH ta ofrece posicionnan di practica cu no solamente ta enfoca riba experiencia individual di e studiante, pero tambe ta stimula desaroyo social mas amplio door di involucra nan activamente den un ambiente educativo y practico. Pabien HOH Academy y pabien Hospital cu un logro mas!