ORANJESTAD – Recientemente e team di Centraal a tene un encuentro di empleadonan, unda apresenta un analesis detaya di e resultadonan principal logra durante e aña 2023. Tambe a comparti e strategia planea pa 2024, ademas a duna reconocemento na empleadonan cual a haci un trabou excepcional durante e aña cu a pasa.
Durante e prome parti di e presentacion sr. Carlos Orman, den su funcion di Director Tecnico Operacional, a duna un bista amplio di e operacion di Centraal. El a papia di e vision y mision di e compania cual por ser resumi di e forma aki: “Nos t’ey pa sirbi cualkier persona ku tin mester di un vehiculo por jega na uno”.
Durante e informashon, el a subraya e necesidad pa haci e maximo esfuerso pa mehora e nivel di comunicacion interno, e iniciativa pa implementa un Transformacion Digital y introduci tecnologia pa facilita e procesonan den e compania pa asina optimalisa e trabou y mehora comunicacion cu cliente. Adicionalmente, el a duna un bista riba e autonan di mas bendi den 2023 y a presenta e modelonan nobo di Vehiculonan Electrico (EV) pa 2024. Tambe el a duna un bista riba e compromiso di e compania pa mantene e posicion di liderazgo pa locual ta Vehiculo Electrico.
Despues sr. Marlon Blom, den su function di Director, a anuncia e mehoracion den e dianan di vakantie pa empleadonan cu ta mas tanto tempo den servicio di e compania, como tambe un aumento di salario pa tur empleado, pa juda contra e aumento di costo di bida cu a afecta un y tur recientemente. Despues di e anuncio aki, el a sigi duna un bista riba e logronan di e compania durante 2023.
Locual a resalta mas ta con Garage Centraal a logra mantene un posicion di mas cu 28% di e total, riba e mercado di benta di auto nobo na Aruba durante 2023, cu un cantidad record di autonan bendi. Ademas a nota un progreso den e areanan di servicio y parts tambe, dunando reconocemento na e diferente departamentonan aki pa nan trabou duro. Pa finalisa, el a reconoce e trabou ehemplar di Centraal Lease pa facilita financiamento di autonan, algo cual a aporta enormemente na e crecemento total di e compania.
Como parti di e encuentro anual, e team di maneho ta contento di reconoce e empleadonan cu mas a destaca den 2023. E sigiente empleadonan a demostrá un compromiso excepcional, cu un contribucion sobresaliente: “Rookie of the Year” a bai pa Gyon Kelly, e “Most Improved” a ser gana door di Carissa Lopez–Croes, e “Centraal Award” a ser duna na tres empleado di departamento di Administratie, esta Angelino Daal, Jo-Ann Lacle cu Carissa Lopez Croes, y e reconocemento pa mihor prestacion door di e mecaniconan a keda pa Michell Stamper na di tres lugar, Fredy Yucra na di dos lugar y Bartolome Rivera como ganador pa 2023.
Finalmente, e reconocemento pa “Employee of the Year” a cay den man di Sharina Thielman–v/d Linde, den cual a sa di sobresali pa su conocemento, nivel halto di responsabilidad y hopi corecto den su trabou como parti di e departamento di Administratie.
Sr. Blom a anuncia cu Tony Hartman Kok, ken te cu awor tabata Sales Manager, lo wordo promovi pa bira Director di Benta pa Garage Centraal.
Cu esaki a termina e encuentro aki, locual a haya un bon acogida entre e empleadonan considerando e anuncionan haci, ademas di e esfuerso cu gerencia di Centraal ta haci pa ofrece su empleadonan mas informacion cu ta posibel.
