E subsidio a aumenta di aña 2022 pa 2024 cu 2.1 miyon florin.

ORANJESTAD: Diaranson ultimo, Minister di Enseñansa y Deporte Endy Croes a reuni cu tur federacion deportivo na Aruba pa haci entrega di subsidio di aña 2024. Tambe presente na e ocasion aki tabata e presidente di Hunta di Supervision di Stichting Sportsubsidie (SSA) Sr. Hervé Ruiz cu a hiba palabra y a introduci e miembronan di directiva,comision tecnico y “bestuurder” di SSA. Minister Endy Croes a duna un splicacion di, entre otro, reglamento di SSA, vision di turismo deportivo, proyecto di Sport Management & Event Management y di e deportistanan cu ta pidi placa riba caya.Fuera di esaki, Minister Endy Croes a indica cu tin algun federacion deportivo cu no ta ricibiendo placa, pa motibo cu no ta cumpli cu cierto rekisito. Minister Endy Croes a haci un peticion na e presidente actual di e Hunta di Supervision di SSA pa reuni cu e federacionnan aki pa yega na un plan concreto pa asina nan tambe por cumpli cu e condicionnan y cuminsa ricibi subsidio. Tambe, e mandatario di Deporte a informa e federacionnan cu Premio Excelencia den Deporte (PED) lo tuma e luga e aña aki den e luna di april y a pidi cooperacion di tur federacion deportivo pa entrega nomber di nan nominadonan na tempo. Na final di e anochi, Minister Endy Croes y SSA a reparti subsidio na 36 federacion deportivo. Minister Endy Croes a splica cu di aña 2022 pa 2024, e subsidio a aumenta cu 2.1 miyon florin. Pues, den total a otorga 4.3 miyon florin di subsidio na tur federacion deportivo pa aña 2024. Pa finalisa, Minister Endy Croes a indica cu e tabata un anochi exitoso y ta desea e federacionnan deportivo hopi exito e aña aki. Cu deseo, disciplina, determinacion y dedicacion ta logra.