E comerciantenan aki no ta haya e declaracion den e portal BO impuesto

ORANJESTAD – Departamento di Impuesto ta recorda e comerciantenan chikito cu ta cay bou e Areglo pa
comerciante chikito of KOR (Kleineondernemersregeling), cu nan no tin mester di entrega e declaracion anual
(jaaraangifte) di BBO/BAVP/BAZV mas manera antes.
Entrante aña 2023
Cu implementacion di e Plan di Impuesto 2023 entrante 1 di januari 2023, e comerciantenan chikito cu tin un
eenmanszaak y cu tin un volumen di benta di Afl. 50.000 of menos pa aña, pa ley, ta wordo exonera y pues no
tin e obligacion di haci declaracion y pago di BBO/BAVP/BAZV manera otro comerciantenan. Tampoco e
comerciantenan aki tin mester di haci e declaracion anual (jaaraangifte) di BBO/BAVP/BAZV den luna di januari.
Portal BO impuesto (BOi)
Debi cu e comerciantenan chikito no tin e deber di haci declaracion di BBO/BAVP/BAZV, nan no ta haya e
declaracion mensual den e portal BO impuesto (BOi). Tampoco nan no ta haya e declaracion anual manera
antes.
Volumen di benta ta mas cu Afl. 50.000
Na momento cu e volumen di benta (omzet) surpasa Afl. 50.000 durante aña, e comerciante chikito tin e
obligacion di cuminsa declara y paga BBO/BAVP/BAZV tur luna, desde e luna cu su omzet a surpasa Afl. 50.000.
E tin e obligacion di avisa Departamento di Impuesto mesora, pa e por cuminsa haci e declaracionnan tur luna
via e portal BO impuesto (BOi). Pa avisa, mester yena un formulario digital via e website:
https://www.impuesto.aw/belastingmiddelen
Registracion pa BBO/BAVP/BAZV
Departamento di Impuesto no ta registra e comerciantenan chikito pa BBO/BAVP/BAZ tanten cu no tin cambio
den e volumen di benta.
E comerciantenan aki ta registra si pa inkomstenbelasting, pa cual nan tin e deber di entrega e cuentanan anual
di e empresa ora di haci e declaracion corespondiente.
E comerciantenan chikito (cu tin eenmanszaak) ta wordo registra pa BBO/BAVP/BAZV:
 Ora e volumen di benta di e empresa surpasa Afl. 50.000 den un aña.
 Ora e comerciante chikito – boluntariamente – pidi pa e wordo registra en conexion cu deduccion di BBO
paga na frontera.
Unabes cu un comerciante chikito wordo registra pa BBO/BAVP/BAZV, e tin e deber segun ley di haci declaracion
y pago tur luna durante tur e añanan cu ta sigui, no obstante si den un aña e omzet a baha bek bou di
Afl. 50.000.
Pa mas informacion por yama Departamento di Impuesto na telefon 522 7423 of 522 7424.

Gerencia di Departamento di Impuesto
15 di januari 2024