Cuanto ‘Short-Term Vacation Rentals’ (conoci como ‘Airbnb’s’) tin na Aruba? A.T.A. ta completa otro estudio y ta actualisa e inventario total!

Oficina di Turismo (A.T.A.) a conduci un estudio pa actualisa e inventario di ‘Short-Term Vacation Rentals’ (STVR) na Aruba. Un estudio cu ta inclui inventario di condominiums existente y esunnan cu ta na caminda pa realisacion y lista actualisa di luga di estadia cu no ta un hotel pero cu si ta disponibel na e turista cu ta keda na Aruba pa un tempo cortico. (Fuente di lista: Transparent & investigacion adicional MGM Source).

Inventario Total ‘Short-Term Vacation Rentals’: 3748 unidad

Segun e resultado di e estudio, por menciona cu den totalidad, Aruba ta conta cu 3,748 unidad di STVR activo cu lo por acomoda 17,321 persona. Si separa e seccion aki den categoria, por mira cu e categoria di Vacation Homes ta conta cu un total di 675 unidad cu un capacidad di 4,598 persona. Categoria Villas ta conta cu un total di 96 unidad cu un capacidad di 1,091 persona. Categoria Apartments in a Complex ta conta cu un total di 914 unidad cu un capacidad di 2,994 persona. Categoria Apartments & Guestshouses ta conta cu un total di 498 unidad cu un capacidad di 1,317 persona. Categoria ‘Others’ cu ta tur acomodacion cu no ta cay bou di e categorianan menciona anteriormente, ta conta cu un total di 254 unidad cu un capacidad di 766 persona. Finalmente, categoria Condominiums, ofreci pa estadia cortico y cu a incorpora den un ‘Rental Pool Program’, ta estima riba un total di 1,311 unidad cu un capacidad di 6,555 persona.

Inventario Total incluyendo condominiums den ‘pipeline’: 4489 unidad

Pa loke ta e categoria di Condominiums, conforme informacion compila pa MGM Source kende a conduci e estudio pa A.T.A., tin 741 condominiums cu ta den ‘pipeline’, cu ta nifica cu nan ta den construccion.

Area unda ‘Short-Term Vacation Rentals’ ta situa: 61% Noord/Tanki Leendert

Por tuma nota cu 61.4% di e Short-Term Vacation Rentals activo ta situa den region di Noord/ Tanki Leendert, 27.6% ta den region di Oranjestad, 4.1% ta den region di Savaneta, 2.6% ta den region di Santa Cruz, 2.3% ta den region di Paradera y 1.6% ta den region di San Nicolaas.

A.T.A. conduciendo estudionan pa actualisa maneho y conseho dirigi riba un desaroyo sostenibel!

A.T.A. lo sigui actualisa diferente estudio conduci na 2017/2018 como parti di e estudio di capacidad di carga cu A.T.A. a conduci na e momento ey. Lo uza e actualisacion di e inventario di STVR pa formula scenarionan nobo pa Aruba; aki ta crea scenarionan unda ta mustra di un banda e beneficionan di desaroyo mara na expansion di acomodacion y di otro banda e costo y peso cu esaki ta trece entre otro pa cu generacion di desperdicio, pero tambe por ehempel e costo social mara na e respectivo desaroyo. Ta comparti e informacion entre otro tambe cu Departamento di Impuesto pa asina mehora coleccion di impuesto necesario. A.T.A. ta uza informacion asina na un manera integral pa ahusta su propio maneho pero tambe pa conseha y influencia maneho nacional riba diferente tereno! Por pensa aki tambe riba maneho di zonificacion, registracion di tur STVR, etcetera.

A.T.A. tin un rol importante pa presenta datonan real, conseho y tuma accion unda cu tin mester pa por fomenta un desaroyo turistico sostenibel, pa por garantisa un futuro balansa na beneficio di Aruba.