ORANJESTAD: Diahuebs mainta durante Conferencia diPrensa di Gobierno di Aruba, Minister Endy Croes un bes mas a trata e topico di “normbedrag”. E mandatario di Enseñansa a enfatisa cu “normbedrag” ta ancra den ley y ta e compensacion cu schoolbesturen ta ricibi a traves di “exploitatiesubsidie”. E “normbedrag” ta cubri costo di, entre otro, mantencion y seguro di e edificio di scol y lokaal,limpiesa di edificio y lokaal, coriente, awa y gas, mantencion di mueble di e scolnan, inversion den material di desaroyo “hulpmiddel” y necesidadnan di scol, lesmateriaal y admistracion. E schoolbesturen ta ricibi un suma cu hopi biaha ta miyones di florin, depende di e grandura di e scol pa cubri tur gasto cu a ser menciona. E ley ta bisa cu cada tres (3) aña mester calcula si mester aumenta e suma aki. E ultimo rapport oficial ta di aña 2009 y e ultimo aumento a tuma luga na aña 2010. Minister Endy Croes a sigui bisa cu enseñansa tabata coriendo 13 aña atrasa encuanto e ahustenan necesario pa e “normbedrag” por ta actualisa. Den aña 2023 un team di experto cu ta compronde e materia a haci un investigacion y calculacion. Na final di e investigacion un rapport a keda presenta, unda cu a indica cu mester haal in e suma di 6.4 miyon florin. Dia 4 di september den e tratamento di“voorjaarsnota”, Parlamento di Aruba a aproba 50%, esta 3.2 miyon florin. Den luna di december aña 2023, ora cu Parlamento di Aruba a trata Presupuesto di Pais Aruba a aproba e otro 50%, esta 3.2 miyon florin. Pues, un total di 6.4 miyon florin a haal in te cu aña 2023. Esaki ta significa cu a inverti hopi mas placa den enseñansa pa asina eschoolbesturen por cubri nan gastonan. Minister Endy Croes a subraya cu ta di lamenta cu oposicion a vota contra di ahustacion di e “normbesdrag”. Pa conclui, Minister Endy Croes a enfatisa cu entre e proyecto di construccion di Juliana School, construccion di fase 2 di Mon Plaisir Havo y“normbedrag”, enseñansa di Aruba a ricibi 16 miyon florin adicional.
