ORANJESTAD – Diamars 14 di januari 2020 a tuma luga e prome dia di workshop pa Studentenraad unit S&S (EPI) cu ta trata Mediawijsheid. E workshop di Mediawijsheid ta consisti di 3 encuentro riba tur diamars di 12:45 pa 3:00 di atardi. Studentenraad y algun studiante di otro unit cu a ricibi un invitacion por asisti.
E topico riba diamars tawata Cybersecurity cu a haya cooperacion di Setar N.V. y Banco Central di Aruba. E oradornan tawata Paul Eelens, Information Security Manager di Setar N.V. y Kristel de Nobrega, Manager Information Security Department di Banco Central di Aruba. Ambos orador ta forma parti di Stichting Cyber School na Aruba.Stichting CyberSchool tin como meta principal pa educa nos hobennan riba methodonan pa por proteha nan mes mihor contra riesgonan cibernetico. Nos hobennan ta esnan mas vulnerabel di nos comunidad. Na un manera interactivo profesionalnan di CyberSchool ta hiba nos hobennan den e mundo di e hacker pa asina eleva nan defensa ariba e topico. Cu meta principal pa inverti awo den nos hobennan pa crea un comunidad (digital) menos vulnerabel.
Durante e atardi aki, e grupo di studiantenan a haya un splicacion tocante cybersecurity y nan por a interactua cu nan smartphone. Aki nan a mira e peliger y e bentaha cu por tin ora bo sa mas tocante e uzo di media, e plataforma cu nan por ta usando y kico ta sosode cu nan data.
Begeleiders di Studentenraad di Unit S&S di Colegio EPI ta gradici Setar N.V. y Banco Central di Aruba pa a permiti nan profesionalnan yega mas cerca di nos comunidad door di comparti informacion cu nos studiantenan y asina yuda cuida e seguridad cibernetico na mundo.
