Por cuminsa entrega “Verzoek vermindering loon” di aña 2024 Un empleado por ricibi mas placa den su man cada bes cu e cobra su salario

ORANJESTAD – Departamento di Impuesto (DIMP) ta participa cu por cuminsa entrega e peticion “Verzoek vermindering loon” di aña 2024. Esaki ta conta pa tur persona cu ta un empleado. E empleado ta haci un peticion na Departamento di Impuesto, pa e por paga menos loonbelasting via su salario. Salario anual di empleado
Na comienso di aña of ora un empleado drenta den servicio, e doño di trabou tin cu calcula su salario anual (zuiver voljaarsloon). A base di e salario anual, e doño di trabou ta calcula cuanto loonbelasting e empleado mester paga den un aña. Normalmente e doño di trabou no ta tene cuenta cu e gastonan personal di e empleado. Sinembargo, un empleado tin e oportunidad pa haci un peticion pa reduci su salario anual cu e gastonan personal. Di e forma aki e empleado ta paga menos loonbelasting y asina ricibi mas placa den su man cada bes cu e cobra su salario durante aña.
E condicionnan
Tin condicionnan valido ora ta desea di haya reduccion di e salario anual. E empleado lo por bin na remarca ora e y/of su casa tin gasto di interes di por ehempel un fianza personal y/of hipoteca. Tambe ta posibel pa haci peticion si e empleado y/of su casa ta pagando un fianza pa estudio. No ta consehabel pa pidi reduccion di e salario anual, si e empleado y/of su casa tin otro entradanan cu no ta salario.
Alabes e siguiente condicionnan ta aplicabel:
– E empleado a entrega e declaracion di inkomstenbelasting 2022.
– E empleado y/of su casa no tin debe di impuesto of tin un areglo di pago pa debe di impuesto.
– Si e empleado y/of su casa tin propiedad inmobil (p.e. un cas), e propiedad aki mester ta registra pa grondbelasting.
Haci un peticion
Pa reduci e salario anual, e empleado mester haci un peticion na Departamento di Impuesto. Esaki no ta obligatorio. E peticion yama “Verzoek vermindering loon” y e formulario ta disponibel riba impuesto.aw. Mester yena y firma e peticion y agrega e compronbantenan manera informacion di salario y otro entradanan, carta di interes di banco of otro instituto financiero. Ora e documentonan ta cla, ta haci un scan di nan tur pa por entrega e peticion den forma digital.
Riba e pagina principal di impuesto.aw, ta click riba “Digitale formulieren”, despues scoge “Verminderingloon” y sigui e instruccionnan. Mester remarca cu no ta posibel pa entrega e peticion den forma di hardcopy.
Decision di Inspector
Inspector di impuesto lo controla e documentonan y tuma un decision pa medio di un “beschikking”. E empleado lo ricibi e “beschikking” y lo entrega esaki na su doño di trabou, kende lo ehecuta esaki den su payroll.
Reduccion di salario anual NO ta nifica cu e empleado ta bay ricibi menos salario. E ta
nifica cu e empleado lo bay paga menos loonbelasting durante aña 2024 y asina ricibi
un suma poco mas halto den su man cada bes cu e cobra su salario.
Pa informacion mas detaya, por consulta e website di Departamento di Impuesto Vermindering loon |