Cu snacknan Hulandes, Peruano y cu nos bebida nacional “Aruba Ariba”, a celebra entre Gobierno di Peru y di Reino Hulandes, hunto cu delegadonan di Aruba, e echo cu LATAM Airlines ta cuminsa bula pa un pais den Reino Hulandes, esta Aruba. Ta di dos vuelo di Peru pa Reino Hulandes, pero awo cu mas demanda cu chens cu por aumenta frecuencia mesora. Tur diahuebs, diasabra y diadomingo, LATAM Airlines ta biaha for di Lima pa Aruba. Un logro despues di mas o menos dies aña di negosacion.

 

Un delegacion di Aruba Tourism Authority, Aruba Airport Authority y contando cu presencia di Migracion Aruba, a topa cu CEO di LATAM Airlines, un cantidad di invitado. Na final a regala e Embahador y e Vice-minister di Turismo di Peru un cuadra special di shoco, pinta pa Elvis Tromp di Aruba. Un pintura cu ta representa pasenshi, vision y trabou den union.

“Ta un echo cu aproximadamente 25% di tur Peruano cu scoge Aruba como nan destinacion, ta opta pa ripiti nan experiencia”, asina Ronella Croes, CEO di Aruba Tourism Authority, a expresa durante e ceremonia na Embaha di Reino Hulandes na Peru. Ey a celebra e vuelo inaugural di LATAM Airlines di Peru pa Aruba.

Cu e realidad aki riba mesa, basa riba datonan disponibel, ta demostra e magia y encanto cu nos isla ta ofrece. Cu introduccion di e vuelo non-stop, di unicamente cuater ora, tin confiansa cu e cifra aki lo aumenta significativamente, ofreciendo e pasaheronan nobo un oportunidad di namora di tur loke Aruba tin pa ofrece. Esaki ta posibel awo danki na un aliado masha importante…LATAM Airlines.

 

Manuel van Oordt-Fernandez, Gerente General di LATAM Peru, a expresa di ta masha contento di por inicia cu e vuelo non-stop aki di Lima-Aruba. El a expresa palabra di gradicimento na tur e agentenan di biahe pa haci cu e buelonan ta yega yen Aruba, loke sigur ta algo exitoso pa un operacion cu a cab’i cuminsa. Esaki sigur ta duna un impulso pa sigui crece y kisas pronto lo por papia en bes di tres vuelo pa siman, pa un vuelo diario y kisas te hasta mas cu un vuelo pa dia.

 

Madelaine Burns-Vidaurrazaga, Vice-Ministro di Turismo di Peru a expresa cu di parti di Gobierno Peruano lo duna tur e sosten necesario pa sigui cu e conexionnan pa mundo. Ta spera cu aña 2025 por conta cu hopi mas vuelo y conexion. E ministerio tin confiansa cu lo sigui exitoso. Ademas, el a expresa su gratitud na tur esnan cu ta kere den Perú.

Alexander Kofman, Embahador di Reino Hulandes pa Peru, Bolivia y Ecuador, pero staciona na Peru, a expresa cu ya caba nan tabatin vuelo di KLM for di Lima pa Amsterdam pero awo lo celebra algo cu hopi tabata spera di por a cuminsa cu ne bek, esey ta e vuelo di tres bes pa siman cu LATAM pa Aruba. Ta di dos pais den Reino Hulandes cu lo tin conexion aereo pa Peru.

 

Leyenda pa potret di Ronella Croes

Ronella Croes ta e Chief Executive Officer na Aruba Tourism Authority. E tabata na cuna di nacemento di e entidad na aña 2011, ora el a cambia di un departamento di gobierno pa bira un entidad sui generis, pues mas independiente pa tuma su mesun decisionnan. El a asumi e responsabilidad ora Aruba tabata conta cu 822 mil turista pa aña, te awo cu ta spera di cera aña cu 1.2 miyon turista, via aeropuerto. Esaki ta encera un crecemento di 47%. Den aspecto economico, locual e turista ta laga atras na Aruba, yama tambe e “Tourism Receipts, na aña 2013 tabata mas o menos 2.7 miyon florin y na 2024 ta premira cu e lo bira 5.2 miyon florin, un crecemento di 92%.

Ronella Croes tin un Master Degree den Business Administration di Hogeschool Saxion na Enschede, Hulanda y University of Lincolnshire and Humberside. El a traha den mercadeo na un compania di telecomunicacion, tabata director di Tourism Corporation Bonaire y desde 2011 ta na cabes di Aruba Tourism Authority.

 

Tocante Madelaine Burns

Madeleine Burns Vidaurrazaga ta e Vice-Ministro di Turismo na e Ministerio de Comercio Exterior y Turismo – MINCETUR. El a studia Business Management cu un Master Degree den desaroyo economico. E ta posee hopi experiencia den temanan di Artesania, Turismo y Desaroyo Social.

 

Tocante Manuel van Oordt

Manuel van Oordt Fernandez ta gerente general di LATAM Peru. E tin mas di 19 aña den servicio di e compania pero desde april 2018 den funcion di gerente general di Peru. E ta di descendiente Hulandes y como tal ta masha orguyoso di e logro aki, pa bula pa un pais den Reino Hulandes.