ORANJESTAD – Diaranson 08 di november a tuma lugar e firmamento cu ACCELLERON den planta di WEB. Firmamento di e acuerdo cu ACCELLERON pa un termino di 10 aña ta percura e disponibilidad di piesa y servicio esencial pa e ‘turbochargers.’ Un turbocharger ta un piesa critico pa e funcionamento eficiente y confiabel di motornan RECIP. WEB ta refleha riba e evento y e importancia di e acuerdo.
Firmamento di e ‘Turbo LifecycleCare Agreement’ a tuma lugar dia 8 di november 2023 entre CEO di WEB, Sr. Alfredo Koolman y CEO di ACCELLERON, Sr. Ihab Hlayel, den presencia di Minister Glenbert F. Croes, miembronan di gerencia di ACCELLERON, Sr. Anthony Rojer di Utilities, Presidente di Raad van Commissarissen, Sr. Goswin Oduber, miembronan di gerencia di WEB, SIWA, VWI, SVWEB, afdelingshoofden di WEB, coleganan, contratistanan y media.
E acuerdo cu ACCELLERON lo percura cu e piesanan critico aki ta disponibel. Esaki lo haci mas cortico e tempo pa haci reparacionnan riba e motornan RECIP. Importante pa menciona ta cu e acuerdo aki ta ofrece e oportunidad tambe pa ehecuta trabounan di mantencion y reparacion na Aruba en bes di den exterior, door di expertonan di ACCELLERON y cu sosten di empleadonan di WEB, locual ta bentahoso pa un operacion confiabel, eficiente y continuo. Coleganan di WEB lo tin e oportunidad di sigui cursonan pa desaroya nan conocemento di entre otro, turbochargers.
E motibo principal pa a bini cu e di cuater planta di motornan RECIP IV ta pa baha e consumo di Heavy Fuel Oil y baha emision di CO2. Cu funcionamento di RECIP IV, WEB Aruba a dal un paso mas cerca pa alcansa su obhetivo pa baha su produccion di energia cu combustibel fosil na 50% y produccion cu energia renovabel na 50%. Esaki ta contribui na WEB Aruba su vision di un produccion mas limpi, mas berde y liber di Heavy Fuel Oil.
WEB semper a conoce desaroyonan cu pa nan tempo tawata impactante y a lidera e caminda pa futuro. WEB ta gradici Aruba, coleganan y contratistanan. E firmamento cu ACCELLERON ta un paso importante pa cu e mantencion necesario di e motornan RECIP, y pues un paso significante pa nos pais.
