E motibo di e bishita na Montgomery College ta pa yega na un acuerdo pa traha den colaboracion cu Colegio EPI, Universidad di Aruba y Instituto Pedagogico Arubano (IPA).

 

ORANJESTAD: Durante e biahe di trabou na Merca, Minister di Enseñansa y Deporte Endy Croes hunto cu Minister Plenipotenciario na Washington D.C. Sra. Joselin Croes y directora general di Colegio EPI Sra. Ankie Danker a haci un bishita oficial na Montgomery College na Maryland. E motibo di e bishita aki ta pa yega na un acuerdo pa traha den colaboracion cu Colegio EPI, Universidad di Aruba y Instituto Pedagogico Arubano (IPA). Durante e bishita, a reuni cu dr. Michael Mills y henter e ekipo di Montgomery College, pa evalua riba ki liña por inicia. Un di e opcionnan ta cu Colegio EPI a cuminsa cu un structura nobo pa e estudio di tres (3) aña di ICT y ta mira con por conecta esey pa sigui cu un Associate degree cu e ayudo di Montgomery College. Dr. Michael Mills a expresa cu nan ta entusiasma pa traha den colaboracion cu Aruba y cu e colaboracion aki no ta beneficia Aruba solamente, pero tambe Montgomery College. Desde algun aña atras caba, Minister Plenipotenciario Joselin Croes a bin ta trahando riba e colaboracion aki pa Aruba. Tambe durante e bishita oficial, Minister Endy Croes hunto cu Minister Plenipotenciario Joselin Croes y Sra. Ankie Danker a haya un recorido di e campus. Pa finalisa, Minister Endy Croes ta expresa cu e ta hopi contento pa traha den colaboracion cu e college y ta sigur cu pa inicio di aña 2024 ta bay logra algo bunita cu Montgomery College.