En conneccion cu Dia Mundial di Diabetes e aña aki Aruba One Happy Island Lions Club a uni un biaha mas cu Fundacion Diabetes Aruba y POH pa hiba un campaña di control y prevencion di e malesa Diabetes door di informa, educa y conscientisa nos comunidad. E tema di dia Mundial di diabetes 2021-2023 ta “access to diabetes care”.

Diabetes ta un epidemia global cu ta afecta hende homber, muher y muchanan diariamente rond di mundo. Diabetes ta un di e causanan principal di malesa cardiovascular, ceguera, problema cu riñon y amputacion di pia. Diabetes a causa mundialmente 6.7 miyon morto den 2021.

Club di Lions como organisacion di servicio comunitario, nos ta comprometi na yuda resolve e problemanan mas grave di mundo. Diabetes ta un di servicionan global cualnan ta un desafio considerabel pa nos humanidad y nos ta kere cu ta nos deber pa enfrenta esaki.

Pa varios aña caba Aruba One Happy Island ta organisa actividadnan relaciona cu e Dia Mundial di Diabetes y diaranson dia 15 di november proximo hunto cu Fundacion Diabetes Aruba, POH y Centro di Bario Noord ta organisando un anochi di chekeo combina cu un charla Interactivo na MFA Noord. For di 6.30 PM pa 7.30 PMlo bay tin checkeo gratis di sucu y preshon.

Despues di 7.30PM lo bay tin un charla interactivo cu tin como tema “Kico bo sa di diabetes y Cuanto riesgo bo ta core pa haya Diabetes?”.

E charla aki ta publico y e enfoke ta pa comunidad hiba un bida saludabel y evita di haya e malesa di Diabetes.

Ta pidi tur paricipante pa bini cu nan smartphone of un tablet y yega tempran pa por haci control di suco y preshon cual lo ta completamente gratis.

Tanto hoben como adulto ta bon bini.

Nos ta wardabo.