Diabierna mainta a drenta informe di un accidente serio cu hende herida riba e Green Corridor na e caminda pa bay pariba dilanti Wayaca Falls, mesora a dirigi tanto polis como ambulans na e sitio. Na caminda pa e sitio a drenta informe di cu lo tin un auto cu lo a bolter. Ey a dicidi pa manda tambe e equipo di rescate di bombero. Na yegada di e patruya a topa cu dos auto, un auto marca Ford modelo Mustang color oraño, numera A-34478 cu sla dilanti y patras, tambe un auto marca Nissan modelo Versa color cora, numera V-64, cu tabata gebolter banda di caminda. Na e sitio e patruya por a compronde cu e chauffeur di e Mustang “Cobra” tabata coriendo direccion San Nicolas riba Green Corridor ora cu na un dado momento el a sinti cu algo a kibra den e “diferential” di su auto. Consecuentemente e chauffeur a perde control y accidentalmente a bay dal patras di e Nissan Versa. Door di e impacto e chauffeur di e Nissan tambe a perde control y a bolter. E Ford Mustang a sigui dal den muraya di e cura di e compania di carga pisa canto di caminda y a sigui spin, kibra e “suspension” dilanti di e auto y den e spinmento a bolbe dal patras pa e di 2 biaha den e muraya. Den e accidente aki un persona a resulta herida. Na yegada di e ambulans a atende e victima a transport’e pa Hospital pa tratamento medico.
