Oficina di Turismo ta anuncia cu di 18  te cu 22 di september, Aruba lo ta anfitirion di e prome Aruba Global Travel Conference.  E evento organisa pa A.T.A. ta di gran balor pa Aruba y tin como meta pa establece y mantene bon relacion cu socionan importante den e industria di turismo den e mercadonan mas relevante pa Aruba.

 

Den pasado, A.T.A. tabata organisa tres evento separa, cada uno enfoca riba un mercado specifico: Annual Tourism Conference Aruba (ATCA) pa Norte America, Conferencia Anual di Turismo Aruba (CATA) pa Latino America, y Aruba Meets Europe (AME) pa Europa. Sinembargo, pa 2023 a dicidi pa combina esfuersonan y organisa un conferencia unico cu ta inclui tur e mercadonan mas importante pa Aruba su turismo.

 

E conferencia lo conta cu un total di 156 participante for di 15 pais cu ta consisti di operadornan di turismo y companianan di aerolinea. E programa di cuater dia ta amplio y interesante,  brindando varios oportunidad valioso pa participantenan por conecta cu socionan clave di e industria di turismo riba nos isla y siña mas di e desaroyonan cu a tuma luga na Aruba. Participantenan lo bishita diferente hotel y lo disfruta di diferente experencianan rond di nos isla. Ademas lo tene diferente evento y actividadnan cu lo permiti participantenan pa amplia nan conocemento di Aruba y experencia e “Aruba effect” (di forma directo).

 

Un tema importante cu lo ricibi su debido atencion durante di e programa di Aruba Global Travel Conference ta e tendencianan global di biahe pa 2024, cu a keda delinea den A.T.A. su plan strategico pa 2024. Aki ta trata di tendencianan di biahe caminda bishitantenan ta entre otro busca experencianan cu ta enfoca riba aventura, naturalesa, bienestar propio y sostenibilidad. Tambe lo para keto na e importancia di nos hospitalidad y di desaroyo di nos product turistico, cual ta brinda oportunidad pero tambe retonan – con por maneha y guia esaki conforme un desaroyo duradero? Pa A.T.A. tabata importante pa diseña e programa di un manera cu ta permiti e participantenan experiencia Aruba na un manera cu ta den liña cu e tendencianan di biaha pa 2024.

 

“Nos ta conta cu un evento exitoso cu lo trece hopi beneficio pa nos isla y pa nos industria di turismo. Lo ta un oportunidad pa sigui traha hunto riba un futuro prospero pa nos destinacion.” tabata palabranan di CEO di A.T.A. Ronella Croes.