Diabierna siman pasa Stichting Monumentenfonds Aruba (SMFA) den presencia di Minister Geoffrey
Wever a tene e kick-off meeting pa e proyecto di restauracion di Cas Veneranda.
Durante e meeting SMFA a presenta e arkitecto encarga cu e preparacion di e proyecto cual lo ta
Orlando Hoevertsz cu e team di Hoevertsz Archidesign NV. E restauracion di Cas Veneranda lo
consisti di cinco fase for di investigacion te cu mantencion di e edificio despues di restauracion.
Actualmente hunto cu e bouwteam bou di guia di SMFA su líder di proyecto Daphne Every, lo inicia e
prome fase cual ta e investigacion historico di e edificio, sigui pa e preparacion di e mapanan di e
arkitecto y e resto di e bouwteam p’asina por yega na un destaho dentro di aproximadamente seis
pa ocho luna. Despues di e destaho lo apunta un compania como e contratista encarga cu ehecucion
di e proyecto cual segun plan lo finalisa pa principio di 2026. E proyecto lo ta financia pa Nationaal
Restauratiefonds di Hulanda (NRF) y Stichting Algemeen Pensioenfonds Aruba (APFA) cu un
prestamo na interes abou na Stichting Monumentenfonds Aruba.
Despues di restauracion e edificio lo ta oficina pa Departamento di Asuntonan Economico (DEACI)
combina cu un espacio pa horeca. Asina aki e edificio lo por ta accesibel tambe pa publico por
admira e bunita monumento aki den centro di Oranjestad. Durante e proyecto e comunidad lo tin e
oportunidad pa comparti nan storianan y recuerdonan di Cas Veneranda y haya mas informacion
tocante e historia di e edificio pa medio di un proyecto titula ‘Tales of Cas Veneranda’ cual SMFA lo
lansa den luna di september proximo.
E edificio impactante den Wilhelminastraat a keda construi na 1936 pa Frederico Maximiliaan
(Machi) Arends cu tabata comerciante y e consul di Spaña.
E arkitecto tabata e conocido bouwmeester Dada Picus, cu a bay te Cartagena Colombia pa haya
inspiracion for di un edificio cu esposa di Machi, Maria Veneranda, tabata encanta cune y asina a bin
Aruba bek pa construi e edificio cual awe nos conoce bou di e nomber di Cas Veneranda.
Un di e casnan mas grandi na Aruba den e tempo ey construi den un estilo neobarroco latinoamericano.
Aparte di tabata un vivienda akinan tambe tabata tin un flowershop, un lugar pa bende ijscream y e
consulado di Spaña. Durante añanan ochenta a comberti e edificio den Papiamento restaurant.
Despues cu e restaurant a sali di e edificio esaki a keda bashi y na 2014 un candela grandi a destrui e
dak cu plafond y algun acabada di e muraya.
